آخر كلام ( مع السلامة)

ما عارفة أكتب شنو

ولا عارفة أبدا كيف

بس باختصار

دة آخر موضوع أنزلو في المدونة

حقيقي كنت بحب مدونتي وزوار مدونتي

وكونت فيها صداقات جميلة

ما أظن أنساكم

وما أتمنى تنسوني

كنت بستمتع لم أكتب

وبحس براحة

كأنو دفتر مذكراتي

بس للأسف

خلاص انتهت المتعة دي

انتهت من اللحظة الحسيت انو ما اي كلام جواي ممكن يتقال

حاسة اني مخنوقة

ومتألمة

بس كل البقدر أقولو

قدر الله وماشاء فعل

ربنا يجمعنا في الخير دايما

مع السلامة

بحلــم

بحلم بدنيا جميلة

مافيها نفاق

مافيها خداع

مافيها طعن من الظهر

بحلم بدنيا جميلة

مافيها قلوب سودا

ومافيها مصلحة الفرد

حرام

والله حرام

حاسة إني حأجن

عاوزة أبكي

ليه كل الناس كدة

زميلتي في مادة التخصص

أنانية

متحملاها من بداية السنة

بس فاضت بي

الصراع بين الدكاترة في الجامعة

يضيعو فيها الطلبة

ما من الجامعة بس

من كل الناس

هو الزمن دة متين بقى كدة

طيب ليه أهلنا ربونا نحب الناس

كانو يربونا نتعامل معاهم كأعداء

زي ما غيرنا اتربى

ليه خلونا نكون صريحين

مابعرف أنافق

وما بحب أنافق

من فترة لعبت لعبة مع صحباتي

كان نظامها إن نختار واحدة مننا

وكل واحدة من الباقيات تقول العجبا فيها والماعجبا فيها

لم جا دوري

قالو انو عيبي إن لم حاجة تزعلني بيظهر علي

وإن ما بعرف أسيطر على زعلي

طيب دة عيب؟؟؟؟؟

سبحان الله

المفروض أكون ممثلة بارعة

أمثل إني ما زعلانة

أنافق

وأمشي أنتقم ببرود

وكدة أكون طبيعية

أنا ما كدة

بزعل

وبنفعل

وببكي لو الموضوع بيستاهل

بس خلاص

بمجرد ما الموقف ينتهي بكون مرتاحة

لأن خلاص عبرت عن الجواي

مرات لم اتصدم في ناس

أو أكتشف ان في ناس بتحاول تأذيني

بتمنى أنعزل عن الدنيا

بتمنى أعيش في مكان فيه أنا وأمي وأبوي وأخواني وزوجي

وناس بحبهم ومتأكدة انهم بيحبوني

أنا مخنوقة

ليه الناس بقت كدة

ليه الواحد يطلع لفوق على كتوف غيرو

بحلم بناس واضحين وصريحين

ناس قلوبم طيبة

بحلم وبحلم بس للأسف

أحلامي صعب تتحق

ما دايما العيد بسعيد

كل سنة وانتم طيبين

معليش جات متأخرة

بس والله غصبا عني

العيد جاني ومعاه شوية مشاكل

لو ممكن تدعو لي ربنا ييسر أموري

عموما ماهان علي يعدي العيد بدون ما أهني

كل سنة وانتم طيبين وربنا يحقق جميع أمانيكم

تهنئة خاااصة

ل

بنت أبيها

وأم خالد

أمجد

أستاذ محمد هاشم

دندونة بنت عمي

د. عمرو فاروق

مجنووون

magnOlia

محمد (( أسرة التحرير))

وكل زوار المدونة

أتمنى دايما يجمعنا الخير والفرح

عيدكم سعيد

بـــدون

كنت ناوية أنزل موضوع


بس كنت صايمة


وتعبانة


واتكاسلت


وهسة فطرت



وللأسف تقلت



وبقيت شبعانة


ومرخمة


وبرضو متكاسلة





فااااااا


توفيرا للوقت والجهد


دوسو هنـــــــــــــا

فيتامـــين واو

سبحان الله

المكان استقبال واحد من المستشفيات الخاصة

راجلين واقفين بين الاستقبال والبوابة الداخلية

نسوان ورجال ماليين الاستقبال

وعاوزين يزوروا مرضاهم

الراجلين الواقفين مصممين ان مافي اي واحد حيدخل

لان الزيارة انتهت

طيب يا ابني احنا صلينا التراويح واستحمينا وجينا

نعمل شنو يعني؟؟؟

مابعرف

المهم مافي زيارة

ماما قالت ليه يا ابني ما بنطول

نطمن عليهم بس احنا ما جايين نتونس

وكمان صعب نجي بدري في رمضان

لا وألف لا مافي أي دخول

دي القوانين

ودة وقت راحة المرضى

والزيارة المتأخرة بتسبب ازعاج

ولو دخلناكم بنتعرض لمشاكل

الخ

الخ

الخ

وقفنا مستسلمين على وشك انو نمشي

جا واحد داخل بكل ثقة

أووووووووووووووو فلان

رمضان كريم

كيفك

اسمع

معاي الأربعة نسوان ديل

سبحان الله

الباب اللي كانو حالفين ما يفتحوه ولا يزحو من قدامو

فجأة

اتفتــــــــح علـــى مصــــــــــــراعيه

واتفضلوا ال4 نسوان

والباب اتقفل تاني

وممنوع الزيارة

ولاعزاء لمن لديه نقص في فيتامين واو

لو قلبك عليه بجد

مسا الخيـــر

كيف رمضان معاكم

احنا عندنا أمطار وجو رهيـــــــب الحمدلله

يعني ما بنعطش بسهولة

عموما ربنا يتقبل مننا ومنكم الصيام والقيام وقراءة القرآن

بما ان رمضان فرصة للسمو بالنفس

والابتعاد عن العادات الخبيثة

وبما ان احنا اتفقنا ان نخطو خطوة للامام ونكون ناس متسامحين ونطهر قلوبنا من الغبائن

عاوزة المرة دي نخطو خطوة تانية لقدام

أيوة نوقف تدخين

ماتقول أنا مالي دعوة بالموضوع عشان أنا ما بدخن

ما أنا كمان ما بدخن

بس كتير ناس بحبهم بيدخنو

وكتير ناس بيدخنو بدون مابحترمو الحولهم

طيب

اصلا التدخين ضار ودي معلومة قديــــــــــمة وكلكم عارفنها

طيب هل عارفين ان التدخين حرام؟؟؟

أيوة حرام

وأكيد اي واحد منكم لم يحرم نفسو من الاكل والشراب في نهار رمضان بيحاول قدر الامكان يبعد عن اي حرام

عشان صيامو يتقبل

صح؟؟

ولا الواحد يكون بس عامل ريجيم ما اكتر من كدة!!!!!!

طيب بما انكم بتصبرو على السيجارة حوالي 14 ساعة (( اللي هي فترة الصيام التقريبية))

دة على اعتبار انكم بتتسحرو بي سيجارة وبتحللو صيامكم بواحدة تانية

معناها في قدر من الصبر وقدر من العزيمة

كويس ليه ما نستغل الفرصة دي وكل يوم نزيد المدة شوية

عشان نقلل عدد السجارات

بتمنى كل واحد يعقد العزم ان حيوقف

او على الاقل حيخفف

ويكون اهم حاجة الشجاعة والثبات

قاعد مع اصحابك ومدوا ليك علبة السجاير

قول شكرا بس انا مخفف

حيقولو ليك ياااراجل بطل حركااااااااات

وواحدة ما حتفرق

وياخي حلاتها في اللمة

فكر اللحظة

كل الناس عارفين خطر التدخين

وانت قررت تخفف

ياترى أصحابك مصممين انك تاخد سجارة ليه؟؟؟

حبا فيك؟؟؟

حرصا على مصلحتك؟؟؟

لأ

بس لأنهم أصدقاء سوء

صديقك الحقيقي

أول ما تقوليه خففت

حيقوليك ياحظك

والله بحسدك وبتمنى أكون زيك

ياريتني أملك زي عزيمتك

حيكون فخور بيك وحيكون عاوز يبقى زيك

وهمسة في اذنك كمان

لو واحد من أصحابك قاليك انا مخفف التدخين

قوليه كلمة حلوة تشجعو

لو انت حقيقي بتحبو

حاجة أخيرة

شوفو الفيديو دة

رمضان كريم والمسامح كمان كريم

رمضااان كريـــــــــــــــــــــــــــــــــــــــم

تصومو وتفطرو على خير



ربنا يعينا ويعينكم على الصيام والقيام

رمضان السنة دي عاجبني الحمدلله كل حاجة ماشة معاية تمام

مأجزة من الدراسة

والجو حلو

والحمدلله ماما بقت عاااال العاااال

رمضان الفات قضيتو في المستشفى مع ماما لو متذكرين

الحمدلله على أي حال



كلها بتعدي وتبقى ذكريات

وبمناسبة الذكريات

أحسن الواحد ينسى اللحظات الحزينة البتعدي بيه ويسجل اللحظات الجميلة والسعيدة

عشان لم تعدي اللحظات دي وتبقى ذكريات يكون عندو رصيد كويس من الذكريات السعيدة

مش لانو هو انسان محظوظ وحياتو سلسة بس لانو بينسى الزعل

وبمنااااسبة نسياااان الزعل والذكريات المؤلمة

بتلاقي الناس البنسو ديل اسعد ناس لانهم بسامحو وبغفرو وبحافظو على علاقاتم

وبمناااااسبة مسااامح دي

(( ودي النقطة اللي عاوزة اوصل ليها من قبيل))

ليه ما نبقى ناس متسامحين

مع نفسنا اول حاجة ومع حبايبنا واصحابنا واهلنا

الواحد لم يسامح انسان بيحس بالسعادة مضاااعفة

اولا لانو كسب انسان كان ممكن يخسرو

وتانيا لانو كسب حسنات من رب العالمين

وتالتا بيحس بالراحة النفسية انو شال احساس ضيق من قلبو

شفتو كيف

يعني المسامح بيكسب دنيا وآخرة

وما بيخسر حاجة

ماتقولو لي كرامتنا

لم تسامح انسان بتكون كرمت نفسك ورفعت منزلتك وأثبت إنك انسان كريم وعزيز وواثق من نفسك

أنا عارفة في مواقف صعب تتنسى

بس الصعب مامستحيل

ممكن بالارادة نغلب الصعوبات

صح؟؟؟

يعني ممكن ننسى

أنا بتكلم عن المسامحة لأني أكتر إنسانة محتاجة أغير نفسي

قلبي أسود بصراحة

أيوة قلبي أسود

ما بنسى بسهولة

بنسى في حالة ان الانسان اللي زعلني ما بهمني ولا بيفرق معاي وجودو او عدم وجودو في حياتي

يعني يزعلني موقف اتعرض ليه في مكان عام في لحظة بنساه

ما بتذكرو حتى عشان احكيه

بس يزعلني واحد بحبو دي تبقى كااارثة

لو بعد ميتين سنة ما بنسى

أوريكم إن قلبي أسود بجد

ما ناسية أي علقة من أمي

ولا أي لحظة شاكلتني فيها

مع إن لم كبرت وشفت المجتمع بقى كيف

وشفت ان تربيتي الحمدلله بيشهدو بيها باقي الأمهات

حسيت انها تعبت عشان توصلني للانا فيه

بس برضو مرات بقلب الذكريات وبتذكر العلقة الفلانية والنهرة الفلانية

بحس اني زعلاااانة منها

كمان واحدة من أقرب صحباتي في الجامعة

علاقتنا كانت حلوة السنوات الفاتت

اتغيرت فجاة اول ما اتخطبت

بقت تتكلم من وراي

وتقول حاجات غريبة

انها حاسة ان ايمان استعجلت

او ان الولد شكلو صغير

وبعد العقد قالت في الجامعة ان لبستي ما كانت حلوة

مع ان لم وريتا ليها قبل العقد كان عاجبا

وقالت ان الكوافيرة ماعرفت تمكيجني

مع ان قدامي كانت بتقول ان المكياج رهيـــــــــــــــــب

وغير كدة كتيـــــــــــــــــر

المهم الكلام كان بيوصلني من ناس كتيييييييير

كانو بيجو يقولو لي ماتحكي اسرار علاقتك بزوجك لصحبتك فلانة

لانها بتحقد عليكي

وبتغير

وفعلا علاقتنا اتغيرت

لاني لم اشوفا بحس اني زعلاااااااااانة منها

بس هس بفكر

ليه ازعل؟؟

مش انا عارفة اني كنت حلوة

وان علاقتي بزوجي ناجحة

وان مهما اتكلمت ما حتنقص مني حاجة

طيب ليه ازعل

خلاص

انا عاوزة اوقف زعل

نفسي أنضف قلبي من أي زعل

من كل الناس



عاوزة أتعلم أسامح

وبما ان احنا في رمضان

ورمضان فرصة للخير

فانا عاوزة اتعلم اسامح

يلا كلنا نتغير

كلنا نسامح بعض

كلنا نبدا من جديد

صفحة بيضااااا

مافيها اي نقط سودا



وهمسة أخيرة

العمر أقصر من انو نضيعو في مشاكل وزعل



ورمضان كريـــــــم

أنا حزينة

أنا محبطة

إيه أسويلك

أطوف في سماك وأبقى أعد نجوم ليلك

ولا أسبح في خيالي وأناجيلك

ولا أفك شراعي في مياه نيلك

ايه وايه أسويلك

أحاول مرة بحنان الجد أحجيلك

ومرة ومرة زي أمك الوليلك

مناي وهناي اعرف كل أحاويلك

ايه وايه أسويلك

بكل تحنان أتحمل جراحك وأداويلك

وأعزف لهواك أجمل لحن مواويلك

وأجمع كل حروف الشوق وأغنيلك

وأوقولك

ايه وايه أسوويلك

العاصمة المثلثة بقت مثلث برمودا

يبدو إن القوة المسؤولة عن تحطم الطائرات في مثلث برمودا

قررت

وبدون إعلامنا إن تنتقل إلى الخرطوم....

حيث إنها وجدت جميع الظروف المناخية المناسبة

من حيث









من حيث









من حيث

كل حاجة... المهم هاكم الدليل

10\6\2008

الغموض يكتنف احتراق طائرة في مطار الخرطوم

الرياض، الخرطوم - وكالات الأنباء:

تضاربت الأنباء حول الأسباب الحقيقية التي أدت إلى تحطم طائرة تابعة للخطوط الجوية السودانية مساء أمس بعد هبوطها في مطار العاصمة السودانية الخرطوم.
وأوضح اللواء يوسف إبراهيم مدير المطار ان الطائرة لم تكن تعاني من أي مشاكل فنية واستبعد تأثرها بالظروف الجوية السيئة أو فرضية العمل الإرهابي.
وأكد فتح تحقيق في أسباب الحادثة وان شركة الطيران "إيرباص" ستشارك في التحقيق كونها الشركة المصنعة للطائرة.
وقال مسؤول في الشرطة أن نصف ركاب الطائرة التي كانت تحمل على متنها أكثر من 200راكب نجوا من الحادث.

30\6\2008

تحطم طائرة شحن سودانية ومصرع طاقمها الروسي

تواصلت محرقة الطائرات في السودان وسقطت طائرة شحن جوي فور إقلاعها من مطار الخرطوم أمس وهي متجهة إلى جوبا وقتل أفراد طاقمها الروسي الاربعة، بعد اقل من أسبوع من سقوط طائرة مماثلة في طريقها إلى جوبا أيضا.
ولما يجف مداد تشكيل لجنة ثانية للتحقيق في حادث طائرة الشحن التابعة لشركة جوبا والتي ذهب ضحيتها ستة أشخاص، وقبلها ما زالت لجنة رئاسية تواصل تحقيقاتها في سقوط طائرة سودانير التي أودت بحياة 32 شخصا وإصابة مائة آخرين، وقع الحادث الثالث أمس، وهرعت سلطات الطيران المدني إلى الطائرة التي سقطت جنوب مطار الخرطوم، وهي من طراز (اليوشن76) تتبع لشركة ابابيل للطيران وقد توفي على الفور طاقم الطائرة المكون من أربعة أفراد يحملون الجنسية الروسية.
وتحطمت الطائرة بعد إقلاعها بثوان من مطار الخرطوم وسقطت شرق الساحة الخضراء. وقال الفريق يوسف ابراهيم مدير مطار الخرطوم انه بمجرد إقلاع الطائرة حدث خلل فني فيها واصطدمت بعمود للكهرباء وتحطمت واشتعلت فيها النيران، مشيرا إلى انه سيتم تشكيل لجنة لمعرفة ملابسات الحادث. وكان قد خف إلى موقع الحادث محمود حامد ابراهيم وزير الداخلية والفريق أول عبد الرحيم محمد حسين وزير الدفاع وكبار المسؤولين بالدولة.

14\7\2008

طائرة سودانير-قادمة من جدة تتعطل بعد هبوطها بمطار الخرطوم

الخرطوم ـ الصحافة

تعرضت طائرة تابعة للخطوط الجوية السودانية ، قادمة من جدة امس لعطل في المحرك، مكث معها جميع ركاب الطائرة رهن الحبس نحو «45» دقيقة، ووجدت الطائرة على ساحة مطار الخرطوم مظاهر الاستعداد بانتشار قوات الدفاع المدني وسيارات الاسعاف. وروى ركاب من داخل الطائرة ، حيثيات الواقعة لـ «الصحافة»، وقالوا ان الطائرة تعطل محركها عند هبوطها في مطار الخرطوم، وتوقف تماما ، واحتجز الركاب القادمون من جدة داخلها لمدة «45» دقيقة دون تكييف ، وان عددا من طاقم الطائرة اصطف امام ابواب الطواريء، ومنعوا الركاب من التحرك دون ان يحيطوا الركاب بأي تبريرات لما يجري، الامر الذي اثار ذعر الركاب ، واشاروا الى ان الطائرة تم جرها بعد ربطها بطائرة اخرى عبر «حبل» والركاب بداخلها الى المكان المخصص. وقد تم فتح الابواب، وتم اخراجهم بسلام. وعلى الجانب الآخر كان اهالي الركاب في حالة سيئة، لا سيما وانهم لم يجدوا اجابات لاسئلتهم

15\7\2008

حوادث بالجملة للطائرات داخل مطار الخرطوم

أبلغ مصدر موثوق صحيفة «الوطن» الصادرة اليوم أنّ الرياح التي شهدتها الخرطوم أمس الأول تسببت في تحريك طائرة «فوكرز» تابعة لسودانير، واصطدامها بطائرة إيرباص بواسطة الجناح مما أدّى لتلف جناح الأولى، الأمر الذي أحدث إصابة بالغة بجسم الإيرباص، وذلك أثناء وجود الطائرتين أمام الورش.وتابع أن طائرة ايرباص أخرى كانت متوقّفة ارتطم بها سلّم متحرك، وأنّ هنالك «هنكرين» تابعين لشركتي طائرات خفيفة طارت منهما أغطية الزنك، وتساقطت في أنحاء المطار.
وذكر أيضاً أنّ طائرة انتنوف تابعة لشركة أبابيل اصطدمت مع طائرة تابعة لشركة المجال عندما كانتا متوقفتين، وأنّ طائرة تابعة لشركة بدر للطيران تدحرجت بفعل الرياح إلى مجرى قرب ورش الصيانة.وأورد أنّ كل هذه الحوادث بسبب الفوضى وعدم الرقابة داخل مطار الخرطوم، مطالباً السلطات باتخاذ التدابير التي تمنع تحرّك الطائرات أثناء الظروف الطبيعية، ومراجعة «هناكر» الشركات و ورش الطائرات حتى لا تتسبب في حوادث بمطار الخرطوم.

أنا كنت فاكرة إنو وزني زاد عشان كدة بقيت بتعب بسرعة بس يبدو إنو الجاذبية الارضية هنا هي اللي زادت

قصة قصيرة

هل تحبينه؟؟

كم سامرتني نجومي في محبتهِ

وقضيت أيامي أهوى لياليهـا
ففي الليل أنشد الأشعار أغزلها

وأسرللزهر أشواقي أناجيهـا

ماسر هذا الحب؟؟

في حديثهِ اكسيرُ حبٍّ فاعـل

ٍلكلِّ جروحِِ الحبِ همسٌ يداويها
كم ذا شكوتُ الهمَّ فأبدَلهُ هوى

كالصَدَفَةِ تصنعُ من رملٍ لآليها

أويدري؟؟؟

أتراهُ يـدري أن القلـب مسكنـه

والروحُ قد خضعت فكان سابيهـا
أو عله يعلم أن الشوق يأسرنـي

فاللهفة قد جعلت أوردتي مجاريها

خارج النص

كيف الفرار من حبٍّ تملّكنـي

ومن شوقٍ أداريه بين أوصالي
ومن حبٍّ ومن عشقٍ ومن وجدٍ

ومن فاهٍ يهيم بذكـرك الغالـي
كيف الفرار ياملكي ومملكتـي

لاتظلمني دون العلم عن حالي

قطار الشوق

صباح الخير

عاوزة أسألكم منو شاعر أغنية قطار الشوق الغنوها البلابل وحسين شندي وغيرم كتير؟؟؟ولو ممكن برضو عاوزة أعرف كتبا سنة كم والقصة كانت شنو؟؟؟ ولو في زول بيعرف الشاعر شخصيا ياريت يكلمني عشان انا عاوزاه في كلمتين

بالنسبة للشاعر\علي محجوب فأنا سمعت إن ماهو الكاتبة... وإنو اشترك بيها في مهرجان في التمانينات وهي ماحقتو... انا بعرف الطرف المتهمو شخصيا فعاوزة اوصل لعلي محجوب عشان اعرف منو الحقيقة.. او حتى لو في زول بيعرفو يسألو

الكلام القالو لي قريبي وبالمناسبة هو مهندس خريج جامعة الخرطوم سنة 78قال انو كتبا وكان مقصود بيها كسلا ما عطبرةوكان طالب الوقت داك... كان عندو صديق اسمو كنكور تقريبا كان فنان مغمور في عطبرة... شال منو القصيدة ولحنها وغناها بس يبدو انو ما اشتهر... وقريبي اغترب وسافر وبعد سنين راكب مع واحد في العربية في الغربة شغل شريط البلابل أو حسين شندي المهم انو سمع الغنية... فقال للزول المعاهم تصدق ان الغنية دي كاتبا انا... وعملوها ونسة ويازول ما بصدق والكلامات دي وانتهت الونسة وبس تاني ما اهتم بالموضوع...يلا من كم سنة جا السودان وجاهو واحد من زملاء الدراسة في البيت... وتصادف انو اولادو كانو مشغلين الغنية بصوت عالي... فالضيف علق على جمال الغنية... وقريبي قاليه ان هو الكاتبا وحكى ليه القصة... زميلو ساقو طواااالي لي صحفي ونشر الموضوع في جريدة (( وانا محتفظة بالقصاصة بتاعت المقال)) وطالبو علي محجوب يرد... بس ما رد وتاني قريبي رجع لي الغربة ونسى الموضوع هس كنت بتونس معاه وهفت لي اسالو مباشرة... وحكى لي إن الغنية ياها بس فيها اضافات بسيطة... وقلت ليه انت اديتا لمنو... قال اداها لي اتنين من اصحابو... واحد كان بدرس جيولوجيا وحاليا هو عميد الجيولوجيا جامعة النيلين والتاني اسمو كنكور... بس الأداها لي علي محجوب منو مامعروف فأنا عاوزة لو زول بيعرف علي محجوب يسمع منو الحصل شنو بالظبط لأن الموضوع حارقني بصراحة وغايظني أكتر مما غايظ قريبي

ياترى في زول بيقدر يساعدني في الموضوع دة؟؟؟؟

المرتزقة ((أبو الفلفسة زاتو))

آآآآآي عارفة إني متأخرة عن الركب كالعادة
بس واللـــه كنت مشغولة... وماحكيت ليكم عن ضربة أم درمان....
أنا بصراحة ما عاصرت شي غير التلفزيون... يعني زينا زي الناس برة السودان... بس الفرق إن احنا خفنا والبرة السودان ما خافو...
بمناسبة الناس البرة السودان أنا اكتشفت إن الخبر كلو ما يبعد من مصدرو بيوسع حبتين... يعني أول يوم قالو مسكو أظن 100 عربية أو بالحدود دي.... الخبر وصلنا في الخرطوم من زملائي سكان أم درمان إن حوالي 200... واستمر الرقم بالتزايد كل ما بعد المصدر عن أم درمان... وطبعا الوالدة (( زي ما قلت ليكم كانت مسافرة)) ضربت لينا تلفون بتطمن علينا... وقالت لي صحي قالو مسكو 1000 عربية!!!!!!!!!!!!!!!

هههههه

يلا طبعا حظرو تجوالنا (( عربي تماااام)) واتحبسنا في بيوتنا... ودي كانت إجازة كويسة بالنسبة لي لأنو كان في ضغط شديد علي من تحمل مسؤولية البيت والبزنس حق الجماعة والقراية وتوصيل أختي الجامعة والخ الخ الخ (( طبع النسوان بيحبـــــــــن الشكاية زي عيونن))

المهم بعد فكو الحظر نزلنا الجامعة وخايفيــــــــــــــن من الحاصل ويلا أنا قدام الجامعة ماشة أركب العربية ألقى ليك موقف غريب... اتنين (( شكلهم غرباويين)) واحد نضيـــــــف والتاني مبهــــــــــــــدل وقفو قدام المكتبة.... النضيف قال للمبهدل كلام انا ما سمعتو بس الفهمتو من حركات يدينو ووشو ان قال ليهو اقعد هنا انا بضرب تلفون واجيك... (( يا إما أنا عندي قدرة على التحليل المنطقي أو خيالي واااسع)) وفعلا داك قعد في المصطبة وبقى يتلفت يمين وشمال بخوف كدة... يازووول أنا قلت الليلة لازم أحضر الفيلم كامل (( مجنونة مش كان أدور عربيتي وأمشي بيتنا وأقول أنا مالي!!! يعرفوني شمشاااارة كيف))...المهم مشيت عملت نفسي داخلة المكتبة الجنبو... ووقفت في الباب عاينت ليه شوية... الزول خايف وتعباااان ومغبر غبار ما طبيعي... وفجأة انتبه لي... كيف ما ينتبه لي إذا كان مافي زول حولنا... الناس ما طلعت من بيوتا... عاين لي جوة عيوني... وسبحان الله ما خفت (( مع إني في الأصل جبااااانة)) لاحظت إنو عيونو صفر زي الجماعة الجابوهم في التلفزيون (( المرتزقة)) قلـــت بس ياهو زااااااااااتو... اتلفت على المكتبة لقيت سيد المكتبة ناديتو... جاني برة... قلت ليه برااااحة عاين للزول دة شكلو من الجماعة.. وقف.. عاين ليه... عاين لي تاني... ابتسم... ماعرفتو قاصد شنو... هل ابتسامة بمعنى (( اي والله ياهو)) ولا ابتسامة بمعنى (( بطلي وسوسة يا إيمان)) بس قلت ليه نبلغ؟؟؟ اتردد شوية وتمتم كدة وفي اللحظة دي الزول النضيف جا طالع من المكتبة التانية وقال لصحبو كلام ومشو.... خلاص مشو يعني مافي فايدة أبلغ... قلت لسيد المكتبة خلاص أخير نمشي بيوتنا.. قال لي أأي أنا زاتي حقفل المكتبة وأرجع الوضع ما أمان... فعلا مشيت على عربيتي... وبس هفت لي أعاين وراي للزول الكنت ناوية ابلغ عنو... اتلفت لقيتو بعاين لي
تفتكرو بعداك استنيت!!!! في خلال 5 ثواني فتحت العربية دورت وهربت... (( خووووف شديييد))

أها هس المقدمة دي كلها بس عشان أقوليكم إني مشيت معرض الأسلحة حق أم درمان وجبت ليكم كم صورة من الحاجات العجيبة الشفتها

يلا نتفرج سوا

لاترمى إلا الشجرة المثمرة

مساء الخير


أول حاجة عاوزة أطمن كل الناس الفقدوني وسالو عني إني بخير وبأمان... كل القصة إن كان عندنا ضيف غالي على قلبي الأسبوعين الفاتو فإنشغلت وما دخلت النت... وسافر أول امبارح وبالتالي رجعت لسابق عهدي في إدماني


بأمانة أنا ما كنت ناوية أكتب حاجة الليلة... لأن تعبانة ونعسانة وزهجانة حبتين.... بس في حاجة استفزتني وماحأقدر أنوم لو ما قلت العندي


القصة إن فتحت العداد بتاع الزوار للفترة الكنت غايبة فيها... لاحظت إن في يوم 22-5 عدد الزوار اتضاعف 3 مرات من العادي... غريـــــــــــــــبة... شكيت ان في مكان نزل موضوع عن صفحتي... مشيت قوقل وعملت بحث ووصلت للمكان إياه


منتدى سوداني فيه انتقاد لواحد من بوستاتي... بالتحديد لبوست العنصرية





قريت الموضوع والردود وحاسـة إن مغيوووووووووووظة.... وعاوزة أرد عليهم واحد واحد





يلا نقول بسم الله الرحمن الرحيم





أول حاجة المنزل الموضوع أبوشكيب





كاتب


الحكاية ومافيها إن أقرب صاحبة لي في الجامعة لما تحب تخفف دمها وتتظارف بتقول لي ياحلبية يامقطعة أو عاينو الحلبية المعفنة دي ... المهم لازم تدخل كلمة حلبية مع شتيمة وتضحك بعداك وكلمة حلبية للما بعرفا بتطلق على السودانيين اللونم أبيض عشان في جماعة لونم أبيض أصلهم من مدينة حلب السورية استوطنو السودان من فترة فبالتالي بقى أي أبيض من أي قبيلة حلبي.... أنا قصة حلبية دي ماعندي معاها مشكلة شديد وبالذات ان بيني وبين صاحبتي مافي زعل ولا حساسية....بس بيغيظني الكلمة البعدها... يعني وكأنو أي أبيض معفن أو أي أبيض مقطع (( بخيل))
كنت ساكتة على الموضوع دة لحدي ما كنا في الجامعة من فترة بنتناقش في موضوع القبائل.... صاحبتي محسية ومعانا ولد جعلي وولد شايقي من دفعتنا..... كنا بنتونس وكل زول بيكاوي التاني بعيوب قبيلتو.... وفجأة سألوني من قبيلتي.... وريتم قبيلة الوالد وقبيلة الوالدة.... وبما إننا من ما جعليين ولا شوايقة ولا رباطاب ولا محس فما كان من الجماعة الا انهم اتفقو على اني ما سودانية.... اتهموني بأني مصرية ومتسلبطة في السودانيين ساي المصيبة إن اتسلبط فيهم على شنو؟؟؟؟؟؟!!!!!!!!! هو من حلاتو السودان دة ولا من الكرم البنلقاه في المطارات لم يشوفو الباسبورت السوداني... ولا من حسن سمعتنا بين الدول التانية.... يعني أنا لو كنت مصرية هل كنت حأفكر أبقى سودانية؟؟؟؟-------------------------.....
طبعا لشىء فى نفس يعقوب لهفت ليكم الكلام الفوق ده من هنا :http://emoo-83.blogspot.com/2008/02/blog-post.html



لاحظو إن عمل نظام (( ولاتقربو الصلاة...))
عاوز يعمل جوطة من مافي
يعني يا أستاذ أبو شكيب كان تنقل الموضوع كلو عشان يعرفوني أحسن من كدة... ولا باقي الموضوع ما بيخدم الغرض الابليسي الفي راسك.... بالله لو عاوز تطلع لي فوق ما تركب على كتوف الناس...



اول رد كان من واحد اسمو مصطفى عثمان...
شكلو ماشاف الرابط طوالي قرا الكلمتين النقاهم ابوشكيب ورد على اساسم
كاتب

يعني أنا لو كنت مصرية هل كنت حأفكر أبقى سودانية؟؟؟؟
-------------------------
ده دليل على ضعف انتماء صاحبة المقال للسودان

أولا بقوليه كان ممكن ترجع للمقال وبعداك تحكم على انتمائي... ثم تانيا أنا ما قلت ان بتمنى اخد جواز مصري ولا غيرو... أنا قلت ان لو كنت مصرية ما كنت حأتسلبط في السودانيين... ودي الحقيقة... أمسكو ليكم مصري وأسألوه.... كل واحد بيشوف بلدو أحسن بلد... يعني المصري بيشوف مصر أم الدنيا... زي ما حضراتكم شايفين السودان أروع بقعة في الكون.... يعني أنا لم كتبت الجملة دي كنت مغيوظة من زملائي القلت ليهم (( أنا سودانية)) وقالو لي إنتي(( مصرية متسلبطة في السودانيين))


عضوة تانية اسمها حبيبة سودانية
ردودا كانت كالآتي

الرد الأول



ما غالبنى امرق بسبور مصرى لكن ابدا ما بدلة هويتى السودانيه بالمصريه وحسى لمن يسئلونى ياتو بلد فيهم احلى بقول ليهم بلدى السودان انا لو بالغت بقيت بقعد فى مصر اجازه اسبوعين وفى الثالث بحس انى مخنوقه برغم عندى اهل ومعارف فيها لكن ما بحس انى انا الا فى بلدى شعور ما اظن حيفهموا الا الاغتربوا فى الخارج ومهما طال الزمن بيهم وكبروا بيحسوا ان فى حاجه اساسيه نقصاهم وهى الانتماء والانتماء ما معناتو ناس الانتماء لهويه وارض ووطن

الرد التاني


برغم فى بلدى ما معتبرينى سودانيه لكن يكيفينى احساسى انى فيها وبين اهلى الما معتبرينى منهم عشان لسانى معوج بهويات كتيره
((وراصة 5 وشوش بتبكي))


الرد التالت


عارف من ايام فاتت مشيت حفلة عيد ميلاد لمصريين معارفنا هنا وقعدنا وكان زوجة واحده فيهم جات اول مره من اسبوعين اها لمن بدينا نتناقش وكيف البلد معاكى احساسى بانها شايفه ان مافى متعه هنا فى بلدنا فرسنى وطلعت هى ما مرقت من شوارع العمارات قولت ليها انت اصلا ما شوفتى البلد عشان تقدرى تحكمى وتقارنى بينها وبين مصر واتحمقت ودمى فار قربت اقوم انتفاضه وفى لحظات زى دى بعرف قدر شنو انا بحب وطنى واقل حرف من غريب فيها بيثير فينى الغضب والحماقه انى ادقه يعنى نحنا كسودانيين لو نبذنا بلدنا ما بتفرس قدر ما زول ما سودانى يقول فيها بيخ بتمنى اعضى فى فاخورته



الرد الرابع

ردت على التعليق دة
Originally Posted by شلولو
دا منو السجم الما بعتبرك سودانية ، اتا سودانية وكمان جعلية

كتبت

محسيه يا فرده

كتيرينخالص وكمان لمن يحبوا يفرسونى بيقولوا لى يا مصريه فى بورد مره فى اجتماع كانت ضيفه يا زميله لا اذكر قالت المصيبه الحاصل ان حبيبه سودانيه طلعت ما سودانيه عشان لسانى المعوج

الرد الخامس

Quote:
Originally Posted by امل
حبيبه انت حبيبة السودانيه خليك دائما ذي ما انت ما تاثر فيك اي تلميحات سخيفه واحنا يكفينا اسمك دي حتي لو لسانك اتلولو بميت لهجهBe
you always dear


ردت

تسلمى يا سكره والله اسم على مسمى اديتنى امل فى التصدى للتصرفات دى دا حتى البايعين لمن اجى اسئل على حاجه ويلاقوا لسانى معوج هاتك يا نقوره ويردوا عليه بالمصرى قبال كده عملتها فينى مدرسه فى الجامعه وبالجد اى زول يحاول يكلمنى مصرى بسيبه وامشى لانى سودانيه وبفهم سودانى سمح ربنا يخليكى رفعتى لى معنوياتى

بالله يا اخت حبيبة ماكان تقولي أنا بت حلبية وعسولة ودلوعة وحنكوشة وبحب السودان مووووووووووت وتريحينا.... ياخي عرفناكي وطنية وحب السودان بيجري جوة دمك بس بالمناسبة أنا اتولدت واتربيت برة وماجيت الا للجامعة (( برغم ان اتقبلت في جامعة الامارات وزي ما معروف الدراسة فيها اقوى من جامعات هنا بمرااااحل وكمان مجانا بس برضو اخترت ارجع السودان واتعصر على اهلي شوية)) المهم يا آنسة لساني الحمدلله ما معووج ولا يوم حاولت أتفلهم على البياعين والناس البسيطين وأتكلم سوداني مكسر... أهم شي الواحد يكون واثق في نفسو وما يفتش للمظاهر


رجع أبو شكيب كتب

لكن فى حاجة مهمة برضو مرات الهظار مع الصديقات مثلا لو عندك صاحبة حلبية وبتهظرى دائما معاها زى ما قالت الكاتبة وتقولى ليها يا حلبية يا معفنة مثلا كده تكونى بتدفعيها للتخندق مع الاخرين ضد السودان دون ان تقصدى ذلك ...وده هدف من اهداف البوست الاساسية

والله تراك كويس وفهمت قصدي من المكتوب
مالك طيب من الأول



أبوشوشو كاتب


يعني أنا لو كنت مصرية هل كنت حأفكر أبقى سودانية؟؟؟؟
دي فعلاً حلبية معفنة وكمان غبية

هس الغباء في كلامي ولا في عدم فهم كلامي؟؟؟؟؟؟؟؟
عموما... كل إناء بما فيه ينضح


الرد البعدو من New Sudan
كاتب


دي مفروض يسحبو منها الجواز عشان نشوفها حتقبل على وين . للأسف في ناس سكنوا السودان أيام العز لكن أولادهم و أحفادهم بيتبرؤوا من السودان عشان الظروف الحالية حاجة طبيعية في أي دولة متعددة الأعراق الأندماج في المجتمع بيحتاج إلى وقت و شوية عزلة عن الأصول


انت لو بتحب السودان ومقتنع بيه ليه مسمي نفسك New Sudan
وبرضــــــــــــــو انا ما قلت ان ما بحب السودان ولو رجعت لكتاباتي بتفهم أكتر


وآخر حاجة جاني اتصاف من عضوة اسمها سلسبيل

كتبت


السلام عليكم البنيه دى كتابه
شوفو باقى مدونتها وهى كاتبه عن السودان شئ جميل هى بس دمها خفيف وسؤالها عادى انا لو مصريه لى اقول سودانيه بس بعدين كلمه يا حلبيه غيييييييييييييييياااااااااااااااظه شديد والناس بقولها عادى


بالظبـــــــــــــــــــــــــــط دة الكنت قاصداه.... يسلم فمك ريحتيني


وختاما بطلب من الناس الشاكين في وطنيتي ديل يرجعو لأول بوستات كتبتها

كانت بعنوان

السودان (1) محبة وعشق
السودان (2) مشاركة الأحداث
السودان (3) العودة

إضافة...

دة رابط الموضوع

الحمدلله على سلامة سامي الحاج و من كانو معه

إنتو حاسيـــن بالأنا حاسة بيه؟؟؟

هل إنتو مبسوطيــــن زيي كدة؟؟؟

أنا مبسووووووووووووووووووووووووووطة

صحيت أقول لأختي تشغل المكيف عشان سخنت

لقيتا واقفة قدام التلفزيون وبتقول لي سامي الحاج جابوهو

اخدت ثانيتين عشان أستوعب

بس بجد فكوه

الحمدلله

الحمدلله

الحمدلله

((نسال الله العظيم ان يفك كل اسراء المسلمين ويعودوا الى اهلهم وذويهم عما قريب))

اللهم آميــــــــــــــــــــــــــــــــــــــــــــــــــــن

سقــــط سهواً

امبارح كان إجازة عشان التعداد
البوليس منع المواصلات من الحركة جوة المدينة... بس انا شفت كم ركشة حايمة...
ماعلينا
المهم ان البلد كانت عايشة في هدوووووء عجيب مامر علي قبل كدة...
احنا لم نمنا كان الجو حـــــــــــر والشارع زحمة وازعاج...
صحيت الساعة 7 صباحا على مكالمة مزعجة
حسيت ان في حاجة غريبة
طلعت البلكونة
الجو بارد والشارع غرقان موية كأنو بالليلة جا اعصار أو فيضان
والأغرب ان مافي ولا عربية معدية
ليـــــــــــــــــه كدة
الحصل شنو
الناس مشو وين
أوع أكون نايمة وبحلم
ولا يكون الحرب قامت واحنا نايمين والناس سافرو وسابونا

أوووه بمناسبة السفر نسيت أكلمكم

أنا وسوبرة (( أختي الصغيرة)) برانا في البيت لأن بابا وماما وسوبرمان (( أخوي الصغير)) سافرو ماليزيا إجازة
يعني عاملين Home alone

احساس عجيـــــــــــــــــــــــــــــــــــــــــــــــــــــــب

وعشان أطمنكم وما اقلقكم علينا فمعانا الغفير بيبيت في الحوش

يعني أماااااان

وبمناسبة الغفير الظريف دة اللي صحاني في مكالمة 7 صباحا حأحكي ليكم الحصل
حضرتو الساعة 11 بالليل قال اختو مسافرة بطيارة 5 صباحا وعاوز يمشي يوديها المطار
قلت ليه اوكي اتفقنا بس الصباح ما تتأخر
الساعة 2 لقيت منو مسكول
طنشت لان كنت نايمة ومامركزة
الساعة 7 لم مسكل تاني خفت وضربت ليه
خير يا ابني مالك
والله يا إيمان انا نسيت الليلة التعداد ومافي اي مواصلات
ما قدرت اودي اختي المطار ولا قادر ارجع البيت هس
ايواااااااا حسيت انو عاوز يزوغ ويقعد هناك
قلت ليه انا بجي اخدك
غسلت وشي ولبست توب امي وشبشب اسود لقيتو قدامي وطلعت (( على اساس ان ماحنزل من العربية))
وطلعت العربية من الحوش وانطلقت في رحلة اعادة الغفير

المشكلة المنطقة الوصفا لي ما بعرفها كويس
اضطريت اوقف العربية وافتش عن زول اسألو
وفعلا لقيت واحد واقف في الشارع بس للاسف طلع ما عارف الحتة
بالصدفة جا معدي واحد من النوع الفضولي حبتين
بدون ما اسألو قرب من العربية وقال لي عاوزة تمشي وين
سالتو من المنطقة وطلع بيعرفا
وصف لي
(( طلع فضولي نافع))
شكرتهم الاتنين وضغطت البنزين عشان اتحرك
بس للاسف العربية بطلت
احرااااااااااااااااج
دورتها تاني
ابت
ليــــــــــــــــــــــه ياسنفورتي
يلا اشتغلي
باسم الله
أبت برضو
محاولة تالتة ورابعة وخامسة
والعربية ولا نفس
اتلفت للراجلين الكانو واقفين
فص ملح ودااااب

ياااااااااااااااااااااااا باااااااااااااااااابااااااااااااااااااااااااا
انا خااااااايفة



اضرب لمنو
بيت عمي على مسافة نص ساعة
بيت خالي مسافة 40 دقيقة
طيب اتصل بواحد من زملائي في الجامعة
اووووووووووووه موبايلي ما معاي
ليه كدة بس
معاي موبايل امي بس
شلتو عشان رقم الغفير
طيب اخلي العربية هنا وارجع البيت
مافي مواصلات
اتخيلو عملت شنو

ضربت لسوبرة وصحيتا من النوم
طبعا اتخلعت لان مفروض اني معاها في نفس البيت
قلت ليها انا في الشارع وحصل لي كيت كيت كيت
طيب والمطلوب منها شنو؟؟؟
ماعارفة بس المهم احس ان في زول متعاطف معاي
انهينا المكالمة وخليتا مقلقة علي

الخطوة البعدها
اتصلت بزوجي
وهو برة السودان خااالص
رنيت ليه رنتين وقفلت
ورسلت ليه مسج كتبت ليه الحاصل
برضو ماعارفة استفدت شنو
يلا في زول تاني قلق علي ومابيدو حاجة يعملا

فجأة ربنا هداني افتش رقم واحد بيعرفنا ساكن قريب مننا
واتصلت بيه
كان نايم
صحيتو
قال لي بس استحم واجيكي
لولا العيب كنت قلت ليه ماتستحم
انا خاااااااااااااايفة
الشارع فااااضي
الغريبة حتى الكلاب اختفت
مابعرف كيف
المهم
الجو كان جميل طبعا نتيجة امطار الليلة السابقة
فتحت الشباك ومسكت الموبايل بقيت العب

بعد نص ساعة كدة الزول دة وصل
وفتح الكبوت بتاع العربية
اللي انا طبعا ما بفهم فيه اي حاجة

وماعرف يصلح المشكلة لان على كلامو (( البطارية فيها كربون كتير))
اتصل بميكانيكي
وحيــــــــــــــــــــــــلك لغاية ما الميكانيكي جا
طبعا نسيت اقوليكم ان الغفير اتدبر حالو وجا
الميكانيكي جا (( صنفر البطارية)) والحمدلله اشتغلت
رجعنا البيت بالسلامة
بعد ما وصلنا
جارنا داك قال يشيك لي على الموية بتاعت العربية
اول ما فتحا
حرقتو
وطلع دخااان والموية اندفع وفارت
قال لي العربية دي مسخنة شديد
شكلو مافيها زيت
شيك على الزيت

وياللإحراااااااااااج
ارتفاع الزيت في المقاس ما تامي 1 سم
قال لي العربية دي ما تشغليها مالم تكبي ليها زيت
طيب اجيبو من وين
الليلة المحلات مقفولة
خلاص بكرة
جدا
وطبعا كنا مخططين نطلع ونتفسح لان اجازة والشوارع فاضية
اتحبسنا والحمدلله
ولحد اللحظة دي انا ما عارفة امشي اجيب زيت من وين وكيف واكبو وين
وخجلانة اتصل بالراجل دة تاني

عموما قضينا اليوم محبوسين بانتظار العدادين اللي لحدي اللحظة دي ما عدونا

يعني من هس بكلمكم عدد سكان السودان لعام 2008 ناقص 6 أفراد

ماتنسو

تحديــــث:

بعد جهد وعناء جبن لي سنفورة (( الترياااق)) وشربناها منو كميات نتج عن ذلك زوال الحمى والآلام وأتبعناها ب (( شاور)) من المياه الباردة وانتعشت سنفورة ورجعت ليها (( ولينا)) الابتسامة

وعادت سنفورة تلعب مع السنافير