سقــــط سهواً

امبارح كان إجازة عشان التعداد
البوليس منع المواصلات من الحركة جوة المدينة... بس انا شفت كم ركشة حايمة...
ماعلينا
المهم ان البلد كانت عايشة في هدوووووء عجيب مامر علي قبل كدة...
احنا لم نمنا كان الجو حـــــــــــر والشارع زحمة وازعاج...
صحيت الساعة 7 صباحا على مكالمة مزعجة
حسيت ان في حاجة غريبة
طلعت البلكونة
الجو بارد والشارع غرقان موية كأنو بالليلة جا اعصار أو فيضان
والأغرب ان مافي ولا عربية معدية
ليـــــــــــــــــه كدة
الحصل شنو
الناس مشو وين
أوع أكون نايمة وبحلم
ولا يكون الحرب قامت واحنا نايمين والناس سافرو وسابونا

أوووه بمناسبة السفر نسيت أكلمكم

أنا وسوبرة (( أختي الصغيرة)) برانا في البيت لأن بابا وماما وسوبرمان (( أخوي الصغير)) سافرو ماليزيا إجازة
يعني عاملين Home alone

احساس عجيـــــــــــــــــــــــــــــــــــــــــــــــــــــــب

وعشان أطمنكم وما اقلقكم علينا فمعانا الغفير بيبيت في الحوش

يعني أماااااان

وبمناسبة الغفير الظريف دة اللي صحاني في مكالمة 7 صباحا حأحكي ليكم الحصل
حضرتو الساعة 11 بالليل قال اختو مسافرة بطيارة 5 صباحا وعاوز يمشي يوديها المطار
قلت ليه اوكي اتفقنا بس الصباح ما تتأخر
الساعة 2 لقيت منو مسكول
طنشت لان كنت نايمة ومامركزة
الساعة 7 لم مسكل تاني خفت وضربت ليه
خير يا ابني مالك
والله يا إيمان انا نسيت الليلة التعداد ومافي اي مواصلات
ما قدرت اودي اختي المطار ولا قادر ارجع البيت هس
ايواااااااا حسيت انو عاوز يزوغ ويقعد هناك
قلت ليه انا بجي اخدك
غسلت وشي ولبست توب امي وشبشب اسود لقيتو قدامي وطلعت (( على اساس ان ماحنزل من العربية))
وطلعت العربية من الحوش وانطلقت في رحلة اعادة الغفير

المشكلة المنطقة الوصفا لي ما بعرفها كويس
اضطريت اوقف العربية وافتش عن زول اسألو
وفعلا لقيت واحد واقف في الشارع بس للاسف طلع ما عارف الحتة
بالصدفة جا معدي واحد من النوع الفضولي حبتين
بدون ما اسألو قرب من العربية وقال لي عاوزة تمشي وين
سالتو من المنطقة وطلع بيعرفا
وصف لي
(( طلع فضولي نافع))
شكرتهم الاتنين وضغطت البنزين عشان اتحرك
بس للاسف العربية بطلت
احرااااااااااااااااج
دورتها تاني
ابت
ليــــــــــــــــــــــه ياسنفورتي
يلا اشتغلي
باسم الله
أبت برضو
محاولة تالتة ورابعة وخامسة
والعربية ولا نفس
اتلفت للراجلين الكانو واقفين
فص ملح ودااااب

ياااااااااااااااااااااااا باااااااااااااااااابااااااااااااااااااااااااا
انا خااااااايفة



اضرب لمنو
بيت عمي على مسافة نص ساعة
بيت خالي مسافة 40 دقيقة
طيب اتصل بواحد من زملائي في الجامعة
اووووووووووووه موبايلي ما معاي
ليه كدة بس
معاي موبايل امي بس
شلتو عشان رقم الغفير
طيب اخلي العربية هنا وارجع البيت
مافي مواصلات
اتخيلو عملت شنو

ضربت لسوبرة وصحيتا من النوم
طبعا اتخلعت لان مفروض اني معاها في نفس البيت
قلت ليها انا في الشارع وحصل لي كيت كيت كيت
طيب والمطلوب منها شنو؟؟؟
ماعارفة بس المهم احس ان في زول متعاطف معاي
انهينا المكالمة وخليتا مقلقة علي

الخطوة البعدها
اتصلت بزوجي
وهو برة السودان خااالص
رنيت ليه رنتين وقفلت
ورسلت ليه مسج كتبت ليه الحاصل
برضو ماعارفة استفدت شنو
يلا في زول تاني قلق علي ومابيدو حاجة يعملا

فجأة ربنا هداني افتش رقم واحد بيعرفنا ساكن قريب مننا
واتصلت بيه
كان نايم
صحيتو
قال لي بس استحم واجيكي
لولا العيب كنت قلت ليه ماتستحم
انا خاااااااااااااايفة
الشارع فااااضي
الغريبة حتى الكلاب اختفت
مابعرف كيف
المهم
الجو كان جميل طبعا نتيجة امطار الليلة السابقة
فتحت الشباك ومسكت الموبايل بقيت العب

بعد نص ساعة كدة الزول دة وصل
وفتح الكبوت بتاع العربية
اللي انا طبعا ما بفهم فيه اي حاجة

وماعرف يصلح المشكلة لان على كلامو (( البطارية فيها كربون كتير))
اتصل بميكانيكي
وحيــــــــــــــــــــــــلك لغاية ما الميكانيكي جا
طبعا نسيت اقوليكم ان الغفير اتدبر حالو وجا
الميكانيكي جا (( صنفر البطارية)) والحمدلله اشتغلت
رجعنا البيت بالسلامة
بعد ما وصلنا
جارنا داك قال يشيك لي على الموية بتاعت العربية
اول ما فتحا
حرقتو
وطلع دخااان والموية اندفع وفارت
قال لي العربية دي مسخنة شديد
شكلو مافيها زيت
شيك على الزيت

وياللإحراااااااااااج
ارتفاع الزيت في المقاس ما تامي 1 سم
قال لي العربية دي ما تشغليها مالم تكبي ليها زيت
طيب اجيبو من وين
الليلة المحلات مقفولة
خلاص بكرة
جدا
وطبعا كنا مخططين نطلع ونتفسح لان اجازة والشوارع فاضية
اتحبسنا والحمدلله
ولحد اللحظة دي انا ما عارفة امشي اجيب زيت من وين وكيف واكبو وين
وخجلانة اتصل بالراجل دة تاني

عموما قضينا اليوم محبوسين بانتظار العدادين اللي لحدي اللحظة دي ما عدونا

يعني من هس بكلمكم عدد سكان السودان لعام 2008 ناقص 6 أفراد

ماتنسو

تحديــــث:

بعد جهد وعناء جبن لي سنفورة (( الترياااق)) وشربناها منو كميات نتج عن ذلك زوال الحمى والآلام وأتبعناها ب (( شاور)) من المياه الباردة وانتعشت سنفورة ورجعت ليها (( ولينا)) الابتسامة

وعادت سنفورة تلعب مع السنافير

خطوة للأمام

صباح الخير

معليش طولت ما كتبت (( نظام البت مشهورة وعندها جمهور وبتعتذر ليه)) كنت مشغولة شوية وكمان بالي مشغول بحاجات كتيـــــــــــــــــــــــــــــــــرة ومافي زول عاوز يفكر معاي (( اخس على دي صحوبية))

يلا... ما علينا.... أصلا المثل بيقول ماحك جلدك مثل ظفرك



المهم... أنا (( كالعادة)) عندي موضوع خانقني وعاوزة أتفش... (( أنا ما عارفة لو ما المدونات دي كنت حأفضفض وين))....

الحكاية بتتلخص في سؤال بسيط

هل لازم احنا المسلمين نكون طبقتين

يا إما ملايكة أو اباليس؟؟؟

يعني الواحد فينا يا إما يكون ملتزم ومتدين لأقصى درجة ويعزل نفسو عن كل الملذات أو يكون منحط (( معليش على الكلمة بس عشان تفهموني)) وينغمس في الملذات؟؟



يعني ماممكن واحد يمشي في طريق الالتزام خطوة خطوة؟؟

ماممكن واحد يتدرج؟؟

مثال بسيط.... ليه لو واحدة اتحجبت ورقصت في عرس بيهمس ليها بعض الناس بكلام مزعج نوع (( شنو ياحجة الحجاب وين!!!)) أو (( دة نظام مولانا الذي غشانا)) أو (( الحجاب دة وهمة ولا شنو؟؟))

يعني عشان غطت شعرها وسترت جسمها يبقى التزمت مية مية؟؟؟ طيب شنو أحسن واحدة لابسة محزق وعريان وجسمها مرسوم رسم وبترقص في حفلة مختلطة وتانية لابسة حجاب ولبس محترم وبترقص برضو؟؟؟

مثال تاني واحدة بطلت تصافح (( علما بإن المصافحة أصلا حرام)) يعني ما عملت حاجة تطوعية كدة ولا سنة ولا كدة

لالا هي بس خطت خطوة لقدام

بطلت تصافح إذا لازم تتنقب؟؟؟

ولا لازم ما تتكلم مع أولاد؟؟؟

ما تسلم على ولد خالتا لو جاهم البيت (( يعني ما تقول ليه السلام عليكم))

أنا بصراحة لي حوالي سنة من بطلت المصافحة... انا ما حأقول بقيت متدينة... أنا بس بطلت حاجة بتزيد ذنوبي بدون ما أكون استمتعت بيها.... ماتستعجلو تفهموني غلط... بس الموضوع ان انا ((ما)) وصلت مرحلة من التدين إن أقدر أعمل كل حاجة صح وزي ما كلنا عارفين إن أصعب جهاد هو جهاد النفس... (( إن الواحد يقدر يسيطر على غريزتو ويبتعد عن الحرام بكل أنواعو))... أنا لسة ما بقدر أمنع نفسي عن كــــــــــــل حاجة حرام.... يعني ما قادرة ما أسمع اغاني مع ان عارفة الأغاني حرام... بس الفرق إن أنا بستمتع بالأغاني..... يعني ماقادرة أوقفا.... بس ما بستمتع بالمصافحة وبكل سهولة قفلت الباب دة وكدة اتحاشيت كم هائل من الذنوب.... خصوصا ان في ناس كانو بيزودوها وبيسلمو بالكتف.....

يلا بعد بقيت ما بصافح اتعرضت لكمية من المواقف والمضايقات كأنو ارتكبت جريمة....

والله لدرجة مرات كنت برجع من الجامعة وبركن عربيتي على جنب الشارع أبكي شوية وأمسح دموعي قبل أوصل البيت...

يعني مثلا

واحد زميلي قال لي عاوزك في موضوع بعدين...

قلت ليه خير....

قال لي سمعت إشاعات كدة ما عجبتني (( اتخيلو إنها اشاعات وكمان ما عجبتو))

قلت ليه شنو؟؟...

سمعت انك بطلتي مصافحة....

قلت ليه صح....

ليه ياترى؟؟؟

والله قناعة وراحة نفسية

بس؟؟؟؟

أيوة بس

يعني باقي الإشاعة ما صح؟؟؟

ياترى شنو باقي الاشاعة

قالو انك اتشوكشتي.... وحبيبك باعك وجاتك حالة نفسية.... وبما ان الاولاد لم تجيهم حالة نفسية بيبطلو يحلقو لحيتهم وكدة بيبدو انهم اتدينو (( يعني سبحان الله الواحد مادام التزم شوية يبقى مريض نفسي)) فالحصل ان سمعت انك اتشوكشتي وعدم المصافحة دة بداية الأعراض النفسية التدينية

قلت ليه أبدا ماكدة... هي بس قناعة.... حاولت اطبقا وعمري 14 سنة بس الناس ما رحمتني

وكنت صغيرة على ان اقاوم الضغط دة... بس المرة دي ان شاء الله حستمر...

ودي كانت آخر مرة اتكلم معاي...



و واحد تاني مالاقيتو من فترة.... يوم قاعدة مع صاحبتي جا سلم عليها... وعاين لي قال لي والله يا إيمان خايف أقوليكي مشتاقين تقولي لي استغفر الله.....

وواحد قال لي دي شنو (( العوارة)) دي...

و واحد سماها (( حركات )) بتاخد يومين وتنسيها...

وناس قالو لفت انتباه....

وبت حاولت تتظارف مع ولد وتحرجني قدامو بحركات بايخة كدة....

طبعا دة كلو من الناس المتحررين.... بس ردة فعل الناس الكويسين برضو غريبة نوعا ما

يعني أول ما اقول للواحد ((عفوا ما بصافح)).... يقول لي كوزة ولا أنصار سنة؟؟؟؟

هو أنا لازم أتحزب؟؟؟

أنا ما تابعة لأي حزب...

أنا مؤمنة بالله وملائكته وكتبه ورسله وباليوم الآخر وبالقدر خيره وشره....

مصدقة للرسالة المحمدية وعارفة ان الصلوات المفروضة خمسة وان في سنة وتطوع... وان صيام رمضان فرض والحجاب فرض و...الخ...

يعني ماممكن أكون مسلمة عادية؟؟؟؟

مش في دينا الحلال بين والحرام بين وما بينهما شبهات فاجتنبوها؟؟؟

ماممكن الواحد يمشي لقدام بدون ما يضايقوه؟؟!!

بدون ما يجوه ناس ياخدوه على انفراد ويحاولو يعرفو (( المصيبة)) الخلتو يعمل كدة شنو؟؟؟

والله ناس من أقرب الاقربين لي طعنوني بالكلام.... نوع (( بكرة تقولي عاوزة تتنقبي كمان))

طيب مالو لو اتنقبت؟؟

هو انا لو التزمت الحولي بيفخرو بي ولا يستعرو مني؟؟!!!

يعني لو واحد قريبتو ماشة بجينز واستريتش بيفخر بيها أكتر من واحد قريبتو متنقبة؟؟!!
أنا ما ممكن أقول لواحدة اتنقبت دة شنو العملة المهببة دي!!! بالعكس ببارك ليها وأقوليها ياريت عندي زي عزيمتك... لأن هي في اللحظة ديك أحسن مني...

الغريبة كمان في ناس بتناقش معاي الموضوع كأنو أنا اتخذت قرار خاااااااااطيء وهم عليهم يعيدوني للصواب

ياخي انتو خسرانين شنو

انا ماعاوزة اصافح وأنا حرة....

كفاية تكونو غلط مافي داعي تاخدو ذنبي... يعني كفاية ذنوبكم

أيوة أبعدو عني.... ولو ما بتفخرو بي وبتعتبرو عدم مصافحتي احراج ليكم قدام الناس فأنا كمان ما بفخر بيكم وبعفيكم من (( المعاناة الممكن تلحقكم بسببي))

وربنا يهدينا جميعا