خرج ولم يعد

كان يدري كل أمري
كان يلقاني بحب
وبهمس يحتويني
كان في الأعماق يسري
كان لي نعم صديق
حين أبكي كان يبكي
كان يمحو ضيق صدري
ولبؤسي
غاب عن دنياي بدري

خرج ولم يعد

ياريتنا ماكبرنا

كنا أطفال
شايفين الدنيا بمنظار وردي
بابا وماما أحسن اتنين وكلامهم دايما الصح
عمو وخالتو ناس طيبين
ونفوس نضيفة
وخالتو صحبة ماما
القاعدة تتونس معاها دي
بتحب ماما شديد
زي ما أنا بحب صحباتي وأصحابي

الناس كلها بيحبوا بعض
الدنيا حلوة خالص

أنا بحب جدو
وحبوبة
وهم بيحبوني شدييييييييييييد
وبيحبو البيحبوني





كبرنا شوية
بدا الضل يطل


ما اتخيلت يوم
أقول لبابا أو لماما
إنت اللي غلطان
فلان كلامو صح

اتمنيت دايما يكون كلامهم صح
عشان أنا بكون مبسوطة
ومرتاحة
وسعيدة
إنهم صح
وإنهم أحسن ناس في الدنيا




البمبي بدا يغمق
احتمال سحابة عدت قدام الشمس
غيمة وحتعدي
لأ
لسة الحال ماشي في ازدياد
السواد بيزيد
الدنيا بتضلم
البمبي بقى أحمر
لون الحب؟؟؟

لأ
دة لون القلب المجروح
والدم النازف



صحبة ماما
طلع قلبها أسود
وبتحسد ماما


عمو داك البنحبو
روحنا فيه
بسبب مرتو بقينا نبعد عنو
بقى هو ماهو
هي بتتلاءم
وماما بتكابر
واحنا عاوزين عمو




ولسة
الضلام زايد




جدو ما بحب بابا
عشان ما شاورو في العريس
طيب ياجدو الزمن دة بقى العريس ما بيتقدم
إلا بعد يضمن الموافقة


ومابقى في حد بيشاور حد
حتى الأبو لو وافق
والعم وافق
والخال وافق
والجد وافق
لو ما البت قالت موافقة
مافيش عرس

ماتزعل ياجدو
ومافي داعي تمشي تحكي لناس أغراب
ومافي داعي تسيء لبابا
أنا كنت بحبك شديد
كدة خليتني
أشيل من كومك
أزيد في كوم بابا



ياربــــــي

الضلام
بديت ما أشوف إلا خيالات الأشياء
حتى إنتي ياصحبتي
بتغيري
مني أنا؟؟
صحبتك
لمن كنت بحكي ليكي مشاكلي كنت بحسك أقرب إنسانة لي
وكنت بحس باهتمامك
وإنك مركزة معاي
فرحت إنك سمعتيني للآخر
لمن جيت أحكي ليكي أفراحي
ليه سبتيني ومشيتي؟؟
ليه اتغيرتي؟؟؟




زمان كنت فاكرة الواحد بيقول الكلام النطقو
أتاريه الواحد بينطق حاجة
وبيكون قاصد يقول حاجة تانية خالص
هم ليه ما بيقولو العاوزنو وخلاص
ليه اللف والدوران
وليه أساسا قلوبم وسخانة كدة
في شنو بيستاهل

الحاصل دة كتير علي

وما كنت مهيئة ليه

تعبت

وزهجت

واكتئبت

لغاية اللحظة دي مافي زول زعلان مني

بس للأسف

اللي بحبهم

كتير

زعلانين من بعض

وأنا تعبت بينهم

تعبــــت من الناس المنافقة اللي بتحب المشاكل

الناس اللي بتزيد النار حطب

لو ما حتكون محايد وتقول الحقيقة

أحسن تسكت

زمان
افتكرنا يوم بكرة حيكون أحلى من الليلة
زي ما الليلة كان أحلى من امبارح


ياريتنا ماكبرنا

ميلاد قصة

لأول مرة أحس بالكلام عاوز يطلع بدون إذن
ماقادر ينتظرني أصوغو في شكل قصيدة ولا خاطرة
فيضان من الأحرف
سيول من المشاعر
ماقادرة أسكت
عاوزة أقول

بحبك

بتمناك
في كل لحظة
وكل ثانية
في كل موقف بتخيلك معاي
لوحزينة
أو سعيدة
لو بضحك
أو ببكي
ودايما معاك بتذكر نزار لمن قال

لماذا أراك على كل شيء
كأنك في الأرض كل البشر
كأنك درب بغير انتهاء
وأني خلقت لهذا السفر
إذا كنت أهرب منك إليك
فقل لي بربك أين المفر

ياترى كان حاسس باحساسي؟؟

قدامك
مابعرف أنا منو
بدون ما أشعر
بتصرف
زي مواصفات الأنثى القلت إنك بتتمناها
كل كلام التمرد بتاع زمان بينمحي في لحظة
مش قلت العاوزني يحبني زي ما أنا؟!
لا
غيرت رأيي
عشانك أنا إنسان تاني
ياترى
لاحظت الحاجة دي؟؟

لايوقة
صح؟؟
بتمسك بيك كتير
عاوزاك معاي اليوم كله
ماتلومني
من دونك أموت
لأني

بتنفسك

رمضان مبااارك

رومانسية الغمام

المطر عندو سحر غريب

بيخلي الواحد رومانسي جدا

الماعندو حبيب

بيرسم بخيالو حبيب

ويسرح معاه بعيييييد


.................

والعندو حبيب

زي ما بتنزل المطرة من السما

بتنزل كلمات الحب

من الحبيب لحبيبتو والعكس كمان

مطر

ضحك

جري

احتماءة بجريدة واحدة

أو مظلة واحدة

ودفء المحبة يصد برودة الجو

بظلال غمامة خريفية

تحمل أشواقا وتحية

تسقطها أمطار الحب

تروي الأفئدة المنسية

بحنين أو بعض مودة

أو بعض حروف غزلية

تجبرني أن أحكي عنك

عن شوقي

حبي

عن ولهي

عن بعض مشاعر مخفية

أشتــــاقــك

تحت زخات المطر

أشتاق حبك

ولقاءك

وحروف همسك

وحديث العاشقين

...........

أذكر اللحظات دوما

بعض أحلام

وآمال

بعض ذكرى

لم تكن

ولن تكن

وليس يبقى منها

سوى حزن

وأنين

تجتاحني الذكرى

فأسأل

أين كنا

أين صرنا

اين ضاع الود

كل الود

ضاع

طوق الياسمين

.............

كيف كان الحب

فجرا

كان

نهرا

من تألف

من توافق

من هيام

ومن حنين

.............

أشتاق

للهمسات تصدرها

فتشعل

في قلبي المثقل

بالمحبة

آهات وأنات

.....

للبسمات تبسمها

للضحكات

تنشدها

كالرنين

...........

أشتاق

للأشواق أطفئها

بعبير عطر

ببريد عشق

أو بلقيا

بعد حين

أشتاقك أنت

سيدي

أشتاق اسمك

أشتاق حبك

أشتاق أن أحيا بقربك

ماتبقى من سنين

مقامة اغتيـــاظية

في أحد الأيام.... حين تخلو جداولي من المهام....وتصير الأوقات بين نوم ولهو وطعام..... نوى ابن عمة خطيب شقيقتي الانتقال.... من دنيا العزوبة.... إلى (قولة الخير) و(سد المال)..... وبطبيعة الحال.... دعيت شقيقتي إلى الاحتفال.... وقررت هي أخذي كرفيق.... لأسليها في الطريق.... وحين نصير إلى الحفل الكريم.... أشاركها التعليق على ما ترتدي الحريم.... فأبعد عنها شبح الضيق.... من نظرات النسابة والتحديق.... وحين يقوم الجميع إلى الرقص.... أجالسها فلا تبقى وحيدة.... وبهذا.... تزداد مهماتي العديدة..... ويكون لذهابي أسباب..... فتغدو شقيقتي مسرورة سعيدة..... ولكن الفقيرة لله عنيدة...... فلا أذهب دون دعوة شخصية..... وتعاملات رسمية.... وهنا أخذتني الكرامة والكبرياء..... فأبيت الذهاب ذاك المساء..... وسببت لصغيرتي الاستياء..... حيث لم تفلح في اقناعي أي طريقة..... واستسلمت آخذة ابنة خالتي كرفيقة..... وحين دقت في العرس الدفوف.... وقرع الطبل.... اندمج الجميع في الحفل

أما أنا

بدل أن أكون في العرس

انقطعت الكهرباء

فصرت إلى بؤس

وشمت الأعداء

مذكرات سنفورة -2

السلاااااام عليكم


برغم إني عياااااااااااانة وتعباااااااااااانة وما بقدر أقيف أكتر من 5 دقايق إلا إني زهجت من الرقاد والاتكاء وقررت أعمل حاجة مفيدة

حاجة مفيدة شنو اللي بتتعمل وانا على السرير؟؟!!!


أكيد عرفتو الحاجة


إني أتم مذكرات سنفورة


يلا نقول باسم الله ونبدا

بعد ما نجحت في الجزء الأول من الإمتحان

انتقلت للمرحلة التانية

اللي هي الشارع

كنت خايفة يضايقني واحد بتاع هايس ولا ركشة ويبقى سبب لرسوبي

وأصلهم الممتحنين ديل عاوزين سبب عشان يكتبوا

(( راااااسب))

بس من حظي لمن جا دوري كنا وصلنا منطقة مقطووووعة

الشارع كله فاضي

الاتجاهين مافيهم نفس

ياسلام يا إيمو إنت ربنا بيحبك

أول ما ركب جنبي الممتحن

زبطت المرايا

وربطت الحزام

وزبطت بعد الكرسي

عاملة فيها البت حريفة وواثقة من سواقتي

وعاينت للمرايا اتأكدت الشارع فاضي



وفييييييييييييييييييييييييييييييييييو


دخلت الشارع بتهوووووووور

مخلفة وراي عاصفة ترابية

بقيت أفكر الراجل دة حيقول دي حريفة ولا متهورة

الحمد لله قال حريفة

وواصلت بنفس مستوى السرعة لغاية ما قال لي اركني على جنب

ركنت

وقال لي مبرووووك

شفتو

الحرفنة تلعب دوووور

ركبت مع زوجة خالي في طريق العودة

ورسلت لبابا رسالة لأنو كان برة السودان

مافرح

طيب أخوي

مافرح

اتصلت بماما تلفون

ياماما نجحتتتتتتتتتتتتتتتتتتتتت

مافرحت

كلهم بيقولو مبروووك بس الصوت ما صوت زول فرحان

أحبطوني

بس إن عرف السبب بطل العجب

ماهم من الأول ما كانو عاوزني أسووووق

والامتحان اللي بدون واسطة كانوا معتبرينو تعجييييييز

ها ها ها ها

معليش ياجماعة خيرها في غيرها

حأسوق يعني حأسوووووق



نجي للموقف الأكثر احراجا في حياتي

مشينا أنا ولينا (( بنت خالي ورفيقتي في مغامرة تعلم القيادة))

مشينا المرور نستخرج الرخص

المكتب نظامو كالآتي

الناس بيقعدو في الكراسي (( معلومة مهمة جدا))

واللي قاعد في الكرسي اللي جنب الشباك بيتعامل مع الضابط من خلال الفتحة اللي في الحاجز الزجاجي ولمن يخلص بيقوم يمشي ورا ويجي مكانو اللي كان قاعد جنبو... وعمو اللي واقف بالطرف دة وظيفتو حفظ النظام العام

بما إن أنا ولينا متحمسيـــن فمشينا بدري قبل ما الضباط يبدو الشغل

وكانت الكراسي فااااضية قعدنا براااانا

لينا قعدت في كرسي رقم 1 وأنا في رقم 2

وبدا الدوام وجا الضابط سلم على لينا وأخد منها البيانات

جا دوري

المفروض لينا ترجع ورا وانا اقعد مكانها واللي كان في كرسي 3 يقعد مكاني والخ

بس انا خفت من اكون براي

فمسكت لينا قعدتها في كرسي 2 ومشيت أنا كرسي 1 وبديت اجراءاتي

السلام عليكم

وعليكم السلام والرحمة

الاسم

إيمان

العمر

22 سنة

معاكي اثبات شخصية

أديتو الباسبورت

لااا ما ممكن

باسبورت أخضر إنتي سودانية

أيوة

لالا مستهبلة

لا والله سودانية

طيب أكيد من المنطقة الفلانية

أبدا والله من المنطقة الفلانية

ياخي معقولة انتي فاكراني جاي من وين... ماتغشيني

والله العظيم ما بغشك

طيب مستقرين هناك ولا وين

المهم الونسة طولت حبتين

وأنا فيني صفة

لمن أقابل زول ونستو بايخة ولا مملة ولا محرجة ولا أي شيء بالصورة دي

بحافظ على ابتسامتي كأن شيء لم يكن

بس المرافقني بيكون عينو طلعت

بالقرص

أيوة بقرص اللي معاي

ما أنا لازم أتفشي

وكانت الضحية في ذاك الموقف

لينا حبيبتي

كنت بقرصها في فخذها بكل قوة

عشان أحافظ على طبيعتي مع الضابط

والضابط لمن طول في الونسة

الظاهر لينا تعبت من القرص

بقت تزح يدي بيدها

وأنا عنيدة

أرجع أقرصها تاني

وانتهى الضابط بعد ما انتهت الأسئلة

واتنفست الصعداء

واتلفت عشان أقول لي لينا







(( روحي طلعت))










لقيت اللي جنبي رااااااااااجل

غصب عني

أنا مشغوووووووووووولة

اعذروني

بحكي ليكم الشمار فيما بعد لمن أرجع

دعواتكم لي بالتوفيــــــق

مذكرات سنفورة - 1

حصل انتظرتو زول في مكان لا ضل فيه واتأخر عليكم؟؟؟


بتحصل كتير صح؟؟؟










يلا أنا بابا كان بيتأخر علي وأنا بنتظرو قدام الجامعة



وأقرب ضل على بعد 10 دقائق من البوابة وبابا لا يحتمل الانتظار



وتأخيرة ورا تأخيرة



قررت


رحمة بنفسي


اللي ليها علي حق


قررت


أستقل


وأقوى


وأتشفتن


وأعتمد على نفسي


وأسوووووق عربية










بس المشكلة






شوارعنا المنظمة







وتقيد الجميع بقوانين المرور








خلت أهلي يرفضو حتى مناقشة الفكرة


























ما استسلمت







وقررت أسعى في الموضوع وفي الاقناع بكل ما أقدر عليه












بعد فترة بابا سافر الامارات







وجبنا سواق







خلاني أشتاق لتأخير بابا






















وفي يوم التأخيرة كانت جامدة حبتين







رجعت البيت ولقيت ماما في المطبخ









ماما





عاوزة عربية





عاوزة أسوق





طيب حبيبتي




بسيطة جيبي الرخصة أول واحنا بنجيب العربية




بس بشرط بدون واسطة




((طبعا ماما كانت عارفة إنو إمتحان السواقة بدون واسطة يعني الرسوووووب))




طيب يا ماما




أنا بجيب الواسطة




أوووبس




قصدي الرخصة





جيبيها





(( كانت واثقة من فشلي))




كلامها خلاني أخد الموضوع تحدي




اشتركت في مدرسة تعليم سواقة




واتقدمت بسرعة وكان الأستاذ مبسوط مني




وكان في أستاذة أول مرة تركب معاي قالت لي (( سواقتك راقية))




بجي أحكي لي ماما عشان تفرح معاي




وهي بتطنشني




لأنو من قلبها خايفة علي وماعاوزاني أسوق






ماما خايفة وأنا باخد في الدروس





واللي شجعني أكتر




بت خالي كمان كانت عاوزة تاخد الرخصة





كان عندهم عربية صغيرة غير عربيتهم الأساسية




كنا بناخدها ونمشي الميدان ونتعلم فيها سوى




لغاية ما قررنا نمتحن





على الأقل نجرب








أول حاجة الجسر والخلف





وبعدين الشارع




اتفقنا مع ولد خالتنا يتصرف لينا في واسطة





وهو ماشاء الله





من النوع اللي واااثق من نفسه




أنا بعرف فلان الفلاني وداك العلتكاني وعلان العلاني





واحنا مبسوطيييين وأخدناه معانا يوم الامتحان





أنا وبت خالي وولد خالتي





وصلنا ميدان الإمتحانات





وشايفين الرجال كباااار وشياب





يركبو العربية





يجربو الخلف والجسر





ويرسبو





لأنو





الممر ضيـــــــــــق





يالهوي





احنا حنسوق قدام الناس دي كلها






وين واسطتك ياعزيزنا





قال مافيش واسطة





نعم؟؟؟؟؟؟؟؟؟؟؟؟؟؟؟؟؟


















قررنا نترااااجع




بدلا عن الإحراج





لأنو





في كمية من الإحراجات بتحصل





المنظر المتكرر كالآتي





الممتحَن سايق




ومعاه العسكري في العربية




فجأة العربية بتوقف





والممتحَن يبدا يناقش في العسكري لييييه واديني فرصة تانية والخ الخ الخ






((طبعا أنا ماسمعتهم بس كنت بشوف حركات اليدين))





العسكري بدون أي كلمة




بيمد يدو





ويفتح للممتحَن الباب ويطردوا من العربية





إحراااااااااااااااااااااااااج




فشــــــــــــــــــلة





ماعاوزة أتعرض للموقف دة




على الأقل طيب مايكون في متفرجين يفوقو ال100 شخص






بس ولد خالتي كان مصمم نجرب حظنا مادام وصلنا





واتوكلنا





أنا وبت خالي بدينا نتعازم





منو تمتحن أول





في النهاية عقدت معاها اتفااااق













إنها

تمتحن قبلي









وامتحنت






للأسف








مانجحت









ياسلاااااااااااااااااااام







يعني فرصتي في النجاح انخفضت








لأنو مستواها كان أحسن من مستواي








بس ماكان في فرصة أتراجع لأنو كنت سجلت اسمي ودفعت الفلوووس






وكلو ولا أضيع فلوسي على الفاضي














مشيت




ركبت العربية





ابتسمت للعسكري وسلمت عليه





وبسم الله الرحمن الرحيم





ركبت الجسر





عدى على خير





نزلت منو






مفروض أدخل الممر الضيق وألف يسار بدون ما ألمس الأقماع الحمرا





ياربي





كيف الكلام دة






أنا في لحظة حسيت إنو ما بقدر أعملها قدام






خلي إني أعملها خلف!!!!





اتوكلت على الله





دست بنزين ومشيت





والحمدلله عديتها





وصلت لنهاية الممر






ولازم أعيدو بس بالخلف





أخدت نفس عميق





بديت أرجع






دخلت في اللفة





بديت ألف





وفجــأة









أوباااااااااااااااااااااااااااااااااح






العسكري خبط راسو بيدو








بدون ولا كلمة




وبدون ما أعمل أي حركة




وقفت العربية وفتحت الباب ونزلت





كلللللو ولا الطرد





الكرامة غالية ياجدعان





نزلت وما عاينت وراي





ومشيت نحو الجمهور وكلي احساس بالفشل اللي كنت متوقعاه مسبقا





لمن وصلت





كانو حياكلوني







ليييييييييييييييييييه نزلتي؟؟؟






انتي نجحتي!!!!






ليه نزلتي؟؟؟؟






العربية كانت ماشة صح!!!!





كنت رهيبة!!!!









لمن حكيت ليهم






قالو دي حركات بيعملها العسكري عشان يختبر ثقة الممتحَن في سواقته






يعني أنا كنت ناجحة وبسبب غبائي وخوفي نزلت وسبت العربية






يعني لازم أعيد الإمتحان تاني!!!!!!!!!








لاااااااااااااااااااااااااااااااااااااااااااا
















ما بقدر







ياريتهم ما كلموني






ياريتهم خلوني أفتكر إني رسبت






ياخي






خسارة الابتسامة فيك يالعسكري












بعد يومين






قررنا نعيد الإمتحان





وأول ما دخلنا الميدان




كان العسكري بيمتحن واحد





وبالصدفة شافني





قعد يضحك





يضحك





وأنا اتغظظظظت





هو يضحك وأنا أتغاااااااااااظ






كرهتو









جا دوري







ركبت العربية







طلعت الجسر







نزلت







لفيت يسار







وصلت النهاية








وقفت








بديت أرجع خلف








وقفت عند اللفة عشان أظبط الدركسوون








العسكري قال لي







لا أرجعي شوية تاني







الأخ حاسس بتأنيب ضمير






رجعت




ولفيت




ونجحت





ووقفت العربية صح






ونزلت





والممتحنين المنتظرين صفقوا لي







قالو كنت رهيبة








ولمن مشيت للضابط المراقب عشان يوقع لي النجاح





قال لي





إنتي شكلك كنتي سايقة من زمان بس العساكر ضايقوكي في الرخصة







وانتيهنا من المرحلة الأولى في استخراج الرخصة بحمد الله والمرة الجاية أحكي ليكم المرحلة التانية

النيو لوووك تحت التجربة

مساء الخير يا شباب

طلب صغير

لو الصفحة فتحت معاكم خلو تعليق أو رسالة

وروني هل الرأس والمواضيع والروابط كلها شغالة معاكم؟

لأنه أول تجربة HTML لي

شكرا مقدما

رجعنا من تاااااني

السلاااام عليكم








ياسلاااااام








مدونتي حبيبتي








دفتر شخابيطي


















اشتقت ليك






ولكل أصحابي المدونين والمدونات







والله ليكم وحشة

















غبت فترة






لظروف مريت بيها








بس الحمدلله








بيقولو مالايقتلني يقويني









أتمنى يكون المثل صحيح










رجعت ورجعت المدونة









صح رحمتكم من ثرثرتي فترة






كم شهر
















5 ونص تقريبا







خلاص ارتحتو مني بمافيه الكفاية








أكيد اشتقتو لي








صح؟؟؟