اتعودنا إنو النميمية والقوالات مرتبطة بمجالس النسوان.. وحتى ما كل النسوان... المهم هي شغلة ناتجة عن الفراغ... أو الغيرة
واتعودنا كمان إنو مجالس الرجال الكبار كلها كورة وسياسة ونقاشات
اتعودنا إنو بعض المراهقين بيتفاخرو بينهم وبين بعض بعلاقاتهم وحبكاناتهم والكلام الفارغ دة
واتعودنا برضو إنو بالكتير في عمر الخمسة وعشرين فترة المراهقة بتنتهي ويبدا بعدها مرحلة الرشد
اتعودنا إنو الرجال الكبار ليهم هيبــــــــــــة
واتعودنا كمان لمن الزوج أو الأبو يسمع زوجتو أو بناتو يغتابو فلانة بينهرهم ويسكتهم
بس الما اتعودنا عليهو لسة
لمن تبقى مجالس الرجال لتبادل الشمارات والبذاءات
لمن راجل أولادو اتخرجو من الجامعة يتحدى أصحابو إنو بيقدر يحنك فلانة
أو لمن مراهق في نهاية التلاتينات يتفاخر بإنو علانة_ بت الحسب والنسب - اللي معروف عنها إنها قمة في التهذيب والأخلاق والتقلة مكســــــــــــرة فيهو وميتة عليهو موت... وطبعا كل ما اختار واحدة أتقل وأغلى كل ما كان اندهاش ورد فعل الباقيين أقوى
أو لمن واحد يتكلم عن واحدة متزوجة وبكل فخر يقول إنها بتتصل بيهو دائما تحكي ليهو عن مشاكلها الزوجية
والما اتعودنا عليهو أبدا أبدا
لمن واحد تافه جدا جدا جدا
يتكلم في المجالس
عن بنات أعمامه
هذا زمانك يامهازل فامرحي
اعتذاري لكل الرجال الرجـــــال - والتكرار ما خطأ مطبعي
وخالص عزائي لكل إمرأة مخدوعة في بقايا رجولة أو مقهورة من لا إنسان
