صباااح الخير يافردي الأعزااء... أنا الليلة مزاجي رايق وبس حببيت أصبح... بالرغم انو في اللحظة دي مافي ولا سم2 من البيت نضيف.... والولد البنضف زاااغ مني... لكن برضو هذا لايمنع انو مزاجي يكون رايق... لالا ماتقول علي باردة عيب كدة... اصبر عشان تفهم الحاصل... الحاصل انو امبارح جاتنا عاصفة ترابية من العيار التقيل... كنت بصلي العصر وفجأة حسيت بهزة أرضية أو هزة جوية الله أعلم المهم في جزء اتهز وجزء كان ثابت.... ومافي ثانيتين الا اسمع دوي انفجار عنيف اتضح فيما بعد انو دة باب البيت اتقفل بفعل عوامل فيزيائية من خلخلة في الهواء وانخفاض في الضغط والقوة... تلا ذلك مشاغلات شديدة من اللمبة قليلة الادب الكانت بتغمز لي... اتقي الله انا كنت بصلي....
طبعا بسرعة تفووق سرعة الصوت بمرااااحل حصل تلوث شديد بذكرني بانفجار ابار النفط في الكويت ومافي زول يسألني شفتيها وين مع انك في حياتك مامشيتي الكويت... ماتحكوها شديد... في الركعة الرابعة اكتشفت اني لا ارى ولا اتنفس... ياسلاام عزرائيل قبض روحي وانا بصلي الله أكبر ولله الحمد... بس للأسف سمعت صوت أخوي بيقول لي أقفلو الشبابيـــــــــــــك بسرعة... خسارة انا افتكرت روحي على حسن الخاتمة :-(
المهم خلصت الركعة كيف ماعارفة وطيران طلعتا فوق اقفل الشبابيك... غرفة اختي فيها بلكونة... باب البلكونة كان مقفول بالترباس بس والحمدلله الترباس اتفك من القوة الاعصارية الهائلة وبقيت بصارع فيه وبحاول اقفل... بس كأنو شمشون الجبار واقف ورا الباب بالجهة التانية... أنا الز من الجهة الجوانية وفجاة اكتشف اني بكشط في الموكيت.... وطبعا الجو اصبح ضبابي بصورة جميلة وكأننا في قمة افرست تماما
ومازال الصراع مع باب البلكونة مستمرا... وفجأة من بين الضباب ظهر سوبرمان... قصدي اخوي الصغير ( 14 سنة) جا ينقذني جاب كرسي التواليت ختاها وشمشون لسة بيقاوم ويفوووز.... جاب كرسي التواليت من الغرفة التانية... وبرضو شمشون يكسب.... جاب الكوميدينو التقيل جدا وللاسف شمشون كان خارق بس الحمدلله صف العفش وصل للسرير فبقى مافي منفذ لشمشون... كدة انتهينا من الباب الاول... وبنفس المنوال اغلقنا جميع المنافذ.... طبعا كنا مرهقين وعاوزين نستجمع قوانا ونعيد انفاسنا لوضعها الطبيعي لكن مافيش فايدة الهواء ملوث بشدة... طبعا انتو هس بتتسائلو والمجنونة دي مزاجا رايق كيف بعد دة كلو.... ماتستعجلو ياخ الصبر الصبر... قعدنا في كراسينا نتشهد ونسمع اصوات ناس بطير وبقر بيكورك وبنتخيل في المناظر الحاصلة برة وسوبرمان مصمم يمشي يشوف الحاصل شنو وانا اقوليه لالا عيب خلي الناس في حالها... وفجأة سمعنا صوت يصم الآذان وكلو واحد بقى يتخيل... انا قلت انو دة حادث بين عربيتين اكيد ما شايفين بعض.... بس سوبرمان كان عندو راي مختلف وبصراحة كان اكثر منطقية بس انا كنت رافضاه داخليا عشان كدة نهرتو... هو قال انو دة سقف الجراش بتاعنا طاااااار..... ليـــه كدة يابني ماتفاول علينا.... اووه نسيت اقوليكم انو بابا وماما ماكانو معانا اللحظة ديك... كنا برانا انا وسوبر وسوبرة... قصدي اختي الصغيرة ( 16 سنة) اللي كانت بتاكل رز وفراخ وسلطات متنوعة مع الملايكة... طبعا الآنسة كانت نايمة نومة بتجيب 17 درجة في مقياس ريختر... حتى انو كل محاولاتنا الايقاظية باءت بالفشل... الجميل في الموضوع انو خلال 10 دقايق كانت سوبرة والسرير لون واحد... والاجمل في الموضوع انها لما صحت كان في توأم ليها مرسوم في الملاية... تستاهل دة وقت نوم... استمر الحال على ماهو عليه حتى الساعة 10 بالليل... وكأنو تراب العالم كلو اتجمع وقرر يهاجر للخرطوم... ياســـــلام ياولاد بقينا اغنياء حنحتكر تجارة الرملة وأبقو وروني حتبنو كيف من غير رملة
ياخوانا تعبت هاكم الفاصل الإعلاني دة على بال ما ابل ريقي عشان اواصل كتابة
كلااام ياعوض دكام
شامبو خطير ياعوض دكام
ينضف الكركااار
ويطلع الغبااار
ويلمع التفة
في مدني أو سناار
دة كلااام ياعوض دكاام
شامبو وبس
ياعوض دكام
بالنضافة تحس
ياعوض دكام
تلفت الانظار
وتكسر الجكس
ياعوض دكااام
كلاااام ياعوض دكام
كلام في كلام
بالنعناع
ياعوض دكام
للشعر لماع
ياعوض دكام
أو بالليمون
ياعوض دكام
والسعر يهون
ياعوض دكام
ما النضافة فنون
ياعوض دكام
ومالو الصابووون
ياعوض دكاام
تختو في الجردل
تسوطو في الماااعون
كلااااااام
كلاااام ياعوض دكام
بعد الاعصار
ياعوض دكام
اختو الكركار
ياعوض دكام
شامبو الصبار
ياعوض دكام
اروع خيااار
ياعوض دكاام
كلااام في كلام
تخريمة دعائية
مشاهدينا الأعزاء نتمنى انكم ترحمونا وتغسلو شعوركم بالشامبو عشان المنظر العام... يعني لو فتحتو قوقل ايرث حتلاحظو انو اللون الغالب على السودان هو اللون الرمادي المتبنن اللي هوة ابدا ما لون الارض... دي لون التفف الحايمة في الشارع... ودة ان دل على شيء يدل على النظافة المنعدمة في البلد الجميل السادة دة... ويدل ايضا على ازدياد التركيبة السودانية وارتفاع حجم المواليد والمشكلة ريدتك بقت لي مشكلة... قصدي المشكلة انو الناس كلها طهقانة من بيوتا وحايمة في الشارع فياريت تغسلو التفف عشان ناس المريخ ياخدو فكرة جميلة عننا ويزورونا مرة...
عدنـــــــــــا
أها باختصار كدة... اي باختصار مالك لويت بوزك؟؟
باختصار كدة الاعصار هدأ وتلته رحمة ربانية شديدة بمطرة غسلت الجو من الغبار العالق فيها وردت للروح صباها وفرحتا... كان جو جميــــل يخلي عشماوي يحس بالحب ويكتب أحلى شعر.... ودي طبعا لو حصلت حتكون من عجائب الدنيا ال22
المهم يافردنا الأعزاء نفضنا سرايرنا ونمنا نوما هنيئا مليئا بالتراب وصحينا على جو جميل ومعنويات مرتفعة اتسببت في كتابتي للمقال دة لانو ريحة الدعاش بجد تدوخ.... وبالمناسبة أنا بفكر في مشروع مصنع لعطور دعاشية خالصة للعفش والمفروشات... العاوز يمولني براس المال الرجاء الاتصال بالرقم الظاهر على الشاشة... وان كانت الخطوط مشغولة يرجى اعادى الاتصال... رضائكم هو هدفنا اتصل الآن
اوووه انا طلعت برة الموضوع وفوت الدخلة... دقيقة اجيب الخلف وارجع
لا إله إلا الله... الأعمى الوراي طقشني... حستأذنكم عشان أصفي حساباتي... بااااي مؤقتا
هناك 11 تعليقًا:
7amdella 3ala al salama.. e7na hena wasalatna a'7bar al 3asefa al '3areeba di.. 3ala al 3omoom 7amdella 3ala al salama tany..
shoofi al 9owar fil link da.. momkin ta'7dy laiki wa7da wo ta'7otteeha fil post..
http://www.sudaneseonline.com/cgi-bin/sdb/2bb.cgi?seq=msg&board=100&msg=1177880995
link
حمد لله على السلامة و كفارة و سلامتكم و تراب الدنيا كرامتكم
ده أولا و تاني حاجة الله يدينا كلنا حسن الخاتمة
و الله السودان ده فعلا بلد العجائب يعني جيراننا في الخليج عندهم كمية من الرمال ممكن يصدروها للعالم و برضو حيفيض لكن ما بتحصل عندهم حاجات زي دي غايتو الله كريم
تحياتي للجميع و بالخصوص سوبر و سوبرة
:)
ah ana wa7ed sa7by kan fel 3asefa dyh web3atly video meswaro bel mobile, begad raben yekoun fe 3onkom, bs ana bardo marra kont fel ghard2a wehabet 3asefa zyha keda
http://i4.photobucket.com/albums/y149/MTharwat/Heghada%20Feb%202007/IMG_1269.jpg
يا أيمن طيب أخد لي إذن من صاحب الصور عشان انا ما لقيت ليه اي وسيلة اتصال... وما مشتركة في سودانيزاونلاين انا...
دندونة... تبقى السودان كيـــــــــــف لو ما حصل فيها كدة؟؟!!!!! ماهو لازم تثبت ســـواد نيتها... قصدي سودانيتها... عموما احنا لسة بخير وتوصل تحياتك ان شاء الله
BackBone
دة انت شرفت وآنست ونورت... العواصف دي متوقعة في شهر 4 و5 عشان كدة انا بعرض عليك تجي تقضي شهر العسل هنا في الخرطوم في الجو الجميل اللي احنا فيه دة عشان يبقى شهر عسل مايتنسيـــش.... هههه
LOOL. wallahi ya bit ya emo enty ma naseeeeeee7a nihaaaaaaaaa2eey, wo i think al7ikaya di shaklaha fil 3aila kolla :P ( No offence ment ya Daana :P;))
LOOL. lakin biljad kan yom '7orafy.. I was stuck in my office tab3an.. al computer wal keyboard wo aayi 7aja bigo torab torab, '7allik minahom homa ana zaaaaaaaty bigeet TOrab torab.. LOl
Salamat, shayfenik newbie fe Sudanese blogosphere, golna naslim
=.)
precious
h3 h3 h3
kan tet9aware leke 9ora lelzekra 3shan ba3ad tabge 7aboba ta7ke le a7fadek 3an alsudan w ayamo...
btw, ana konta naseeeeeeee7a bes dandon 3adatne :P
Fluent-Sudani
Allah yesalemak ya man... etf'9al le gwa nasgek gabana...
mowale3en ba'7or teman men alnoo3 alle yezbo6 almazag...
etfa'9al,, etfa'9al
إرسال تعليق