آلام عند حني الظهر كالركوع والقيام من الركوع
آلام عند تغيير الوضع
(( الجلوس أو الاستلقاء))
آلام غريبة نوعا ما بالأفخاذ
طوااااااااااالي جري على قوقل
(( صديقي الوفي))
نتيجة البحث
درجة خفيفة من الانزلاق الغضروفي
لالالالا ما جادي
عيد البحث
اعراض انزلاق الغضروف
ياها زاتا الاعراض
نرجع ورا شوية
القصة بدت شهر 10 مع عملية الوالدة
كانت بتخاف شديد على جرح العملية وعندها هاجس ان الجرح ممكن يفتح
عشان كدة ما بتقوم من الرقاد لو ما سندتها
شوية شوية بقى يجيني الم في ضهري بس بتناساه
رجعنا السودان الحمدلله ودخل علينا عيد الفطر
خدمة الوالدة وضيوف الوالدة وضيوف العيد
الحمدلله بس
عدى عيد الفطر على خير وارتحنا شوية ونسيت موضوع الضهر
كنا الفترة ديك ناويين نعمل صيانة كاملة للبيت
لان كان في مشكلة تسريب في ماسورة داخلية وشوهت منظر الحيطان
دة غير ان اهلي -قبل ما يتقرر لامي العملية- قررو يغيرو العفش القديم وفعلا
اشترو العفش الجديد وملحقاتو
يعني في برنامج صيانة لاااازم يتم
بس بصراحة كنت بقنعم يأجلو الموضوع
لان احنا بتين بس وتعبانين مع بيت طول في عرض ومافيه خدام
وضيوف الوالدة
ماشاء الله معارفا ومحبينا كتار
اقنعنا الوالد ان الصيانة لااااازم تتأجل
واتفقنا
وإتأجلت فعلا
ومر كم يوم كدة
وإذا باتصال دولي على جوال الوالد
يعلن بعدو
إن في عريس متقدم لإيمان
وتمت الموافقة
على أساس
أوريهم إجازتي حتكون متين
عشان يطلبو إجازاتم ويحجزو لاتمام الخطوبة
جميل
اتفقنا على كدة
بعد كم يوم
اتصال تاني
عاوزين الخطوبة تبقى عقد
ليـــــــــــــه يا بابا؟؟؟؟
عشان مكالمات بالليل دي تبقى في اطار شرعي
بس يابابا.... بس شنو؟؟
انتي مقتنعة بيه ولا ما مقتنعة
استخير
استخرنا
خلاص موافقة
تم الاتفاق
بعد كم يوم
اتصال دولي
يا أبو أيمن خير البر عاجله
وإجازة عيد الاضحى قريبة
وأخوان العريس حيكونو مأجزين برضو
لو ما عندكم مانع نتم العقد في عيد الاضحى
وبابا قال موافق
(( شكلو ما صدق يخلص مني))
بس وييييين انا قاعدة معاك لحدي ما اتخرج
هههه
المهم
بابا نسى حتة مهمة
الصيـــــــــــــــــانة
العيد قرب
واحنا اصلا حنصين البيت
ماممكن نستقبل المناسبة دي بالمنظر دة ونصين بعداك
واكتشفنا اننا لاازم نبدأ في التو واللحظة
شفتو الحكم لم يصفر اللاعبين بيجرو كيف
دة الحصل
أنا وأخواني
وأبوي
وحتى أمي بجرح العملية الما تم شهر
والغفير
بقينا في حالة استنفااار قصوى
نلملم العفش
والكرووور
ونفضي دواليب العدة
حالة صعبة
وفي نفس الوقت مفروض نجهز للعقد
الهدوم
الخبيز
العشاء
الخ
حالة ما يعلم بيها الا ربنا
مرات كنا انا وامي نحضن بعض
ونفتحو بيت بكا
احساس بالعجز
(( مع ان الموضوع عدى على خير وبحكي ليكم من باب الدعابة بس... الا ان العبرة خنقتني بجد ))
البيحرق الدم اكتر العمال السودانيين
مافي مواعيد
مافي التزام
الصباغ مستني الكهربجي يخلص والكهربجي عاوز بتاع الجبس يفتح ليه الفتحات وبتاع الجبس عندو بكا
وجا من البكا بعد اسبوعين ما شايل عدتو
قال العدة مستلفة واحد ومارجعا
جاي ليه حضرتك طيب!!! عايز قروش
المهم الوقت ضايق شديد
في خلال أسبوع لازم تكون الصيانة خلصت والعفش اتركب والبيت اتنضف عشان التعارف
في الأسبوع دة كنا كلنا صنايعية
بابا يركب الشبابيك لان بتاع النملية فكاهم ونسى يركبم
واخوي الصغير يعتل الكراسي مع اختي الصغيرة
وأمي مشرف عام
والفقيرة إلى الله عتال
وشيالة تقيلة كمان
(( القال العروسة بترتاح وبيتعبو عشانا منو؟؟))
آخر حاجة عملتها
وياريتني ما عملتها
كان في طربيزة سفرة كبيرة
مقاس 12 كرسي
نوع ياجبل ما يهزك ريح
ومفروض تطلع من البيت
النجار شال من جهة
وعاوز مساعدة
ناس البوهية عملو رايحين
والغفير قال ماشي ياكل
وماعارفة الباقيين وين
المهم شالتني الهاشمية
اتشمرت وشلتها معاه
وصلناها باب المدخل بطلوع الروووح
مرة شيل ومرة لز
واتنفست الصعداء
وكان لازمني كباية موية لأن حلقي أصابو الجفاف
دنقرت للحفاظة أكب الموية
و
و
و
كهـــــــــــــــــــــربا
أطلقت صرخة خليت كل الفي البيت يلحقوني
جات أمي صرخت معاي
بقت مافاهمة الحاصل شنو
أنا مدنقرة وماقادرة اتحرك وببكي
ومع شوية دلك ومساج استعدلت
بس الألم بقى مصاحبني
قضيت الكم يوم الباقية على السرير
ما بدنقر الا للضرورة
بصلي جالسة
وما ساعدت في أي حاجة تانية
والنكتة إن
جا العريس بعد كم يوم
البيت مرتب وجميل وكل حاجة تمام
بس
العروسة معسمة
هناك 10 تعليقات:
هههههههههههه
احلى عروس معسمة ... :P
يا بت سلامتك سحروك الما بيشهوك ..
الخوف تكوني عاملاها حركة عشان تمقلبي اخوانك .. لوووول
هههههههههه
الله يسلمك ياخ
كلك ذوق ياعسل...
بس أولا انا ما عاملاها حركة ومفروض أخواني يكونو عارفين كدة
وتانيا أنا بصلي قاعدة في الكرسي (( ما أظن حعمل حركات على ربنا كمان))
وتالتا ياعسل
لم تحبي تكتبي تعليق وتشككي في مصداقيتي أول حاجة إتأكدي إنك ما داخلة باسمي... (( تسجيل الخروج فوق في الزاوية))
هههههه
أقبضو الحرامي
سلامات يا أحلى عروس
بس بالله دا كلو حصل وانا ما عارف
غايتو كان ما شايفك بعيوني دي راباها يوم العقد
هع هع هع هع هع
PS
أنا قلت البت دي بتكتب لروحها سلامتك وسحروك مالها
و الله أنا برضو قلت إيمان دي بتكتب لروحها ليه ياربي. يعني معسمة و مجنونة كمان ههههه
سلامتك يا عروستنا و الله ما بتستاهلي. معقولة ياخي العريس ده كراعه حارة كده مالها؟ دخل عليكم بصيانة و نقل عفش و وجع ضهر. حالة صعبة ياخ. كان كده أنا أقعد بايرة بصحتي أحسن. هههههه
أها العملية متين؟؟ أوووه آسفة قصدي العرس :D
aymony
غايتو أخواني ما قصرو معاي كللللو كللللو
هس الناس حيفتكروني مستهبلة بجد :(
عليك الله ربيتا كيف؟؟
واااي انا منك
بالمناسبة مشتاقين وحمد لله على السلامة
daana
انا معسمة بس المجنونة دي بت عمك الصغيرة
ههههه
دخلت شيكت على ايميلي من اللابتوب بتاعا وماسجلت خروج... والظاهر كانت عاوزة تكتب لي التعليق دة باسم مجهول بس ربنا كشفا
والله يابت أمي العريس دة ماشي بنظام عصر السرعة... في الاول كان الاتفاق العرس شهر 1... بعداك قال شهر 12... ثم شهر 10... هس آخر كلام قال عاوزو شهر 8....
أنا قررت أقاطعو عشان ما يقول لي نعرس بكرة ههههه
أها ياحبة انتي بتشرفي متين؟؟
سلامات يا عروس
الحمدلله على سلامتك
بوقولوا فى المثل
عسمة تروح ولا بيت مكركب
( مثل صينى )
لكن شهادة اخوك قوية خلانا اطمنا عليك بعد ما قوقل عمل ليك جهجهه برضو راجعى طبيب علاج طبيعى
امنياتى لك بالسعاده
LOOOOOOOL
مأجورة مأجورة ساعدتيه النجار
الله يتممها على خيييييييييييييييير ياختي
(والله انا بعد قلت مالها ايمان بترد على نفسها؟؟؟ هههه)
أستاذ محمد هاشم
تسلم على المرور
هو الموضوع ما سيء يعني أنا بتألم بس لم انحني... طول ما انا واقفة مابكون متذكرة الالم... عشان كدة طنشت الموضوع
بس إن شاء الله بحاول أشوف لو في هنا علاج طبيعي
شنو يا ام خالد
عاوزة تقولي عني مجنونة برضو؟؟!!! :(
خليكي صريحة وواضحة وخشي في الموضوع طوالي
هههههه
(يازولة) وين انتي مختفية كدة
اشتقنالك
إرسال تعليق