فن يا فن

هههههههه

شوفو الفن الراقي دة

عصر العولمة والثقافات الغربية... هههههه





عليكم الله ما فناااان؟؟!!!!! مبااااالغة

ضحكتي نوســة

بيقولو الذكرى ناقوس يدق في عالم النسيان

انا امبارح ناقوسي فلق راسي... كنت بتكلم مع واحد عن الضحك وأثناء الكلام قلت ليه انا كان عندي صحبة من فارقتها ما ضحكت من قلبي... وطبعا بعد انتهى حواري معاه سرحت في الذكريات الجميلة


نوسة.... كانت أقرب صديقة لي... هي ما كانت صديقتي هي كانت اختي... لان الصديق انت بتحكي ليه اسررك وتشاركه همومك... مع نوسة ما كان في هموم... من أشوفا بضحك مهما كنت متضايقة تلاقيني نسيت اي شي...

انا ونوسة درسنا التلات مرحل سوا من الابتدائي مرورا بالاعدادي وطبعا لحدي الثانوي.... وبالصدفة وبدون سابق اتفاق دخلنا احنا الاتنين كلية الصيدلة بس للاسف في جامعتين مختلفات...

كنا واحنا اطفال بنحب نعمل شعرنا زي بعض... والعجب لمن نجيب العابنا ونلعب بيها ونعيش دور ان احنا امهات... ذكريات مابتتنسي

ولم كبرنا شوية وبقو يودونا حدايق النساء والاطفال برانا نقابل صحباتنا.... ونحوم ونلعب... وكبرنا اكتر وبقينا نمشي الملاهي مع اخوانا الكبار ونحضر حفلات الفنانين ونركب العاب المخاطرة....

بتذكر اول مرة قررنا انا وهي ندخل صالة التزلج على الجليد.... طبعا شايفين الناس بتتزلج بكل سلاسة.... مشينا اجرنا الاحذية وجينا
ومن الباب ما خطينا ولا خطوة....حاضنين السوووور بكل قوة والرجلين كأنهم ما حقينا... كل رجل عايشة حياتا براها.... واحنا دافعييين ايجار الاحذية ماممكن نرجعا..... طبعا صمدنا لمدة ساعة بالمنظر دة دون اي تطور يذكر.... وكان الحدث الما اتمنيناه... جو أيمن ( أخوي) وفراس ( أخوها) مارين وشافونا... وقفو من الجهة التانية من السور وهااااات ياتريقة..
وانا ونوسة عاملين ما بنعرفم.... بس هم غياظين بجد....
واحنا في حالتنا التعسفية دي فراس قرر يجي يستعرض مواهبو قدامنا... مشى اجر جزمة تزلج وجا داخل بكل ثقة ومن الباب طاااااااااااااااخ وقع..... تستاااااااااااااااااااهل يافروسي
شمتنا فيه شماتة اليومداك.....

آآآآآه كانت أيام

بتذكر برضو لم كنا في الثانوي كان موضوعنا الأساسي الزواج والعرس.... ونشيل ونخطب ونتقسم.... انتي تاخدي فلان وانا اخد علان... والمصيبة فلان وعلان ما لمحو ولا هببونا بغمزة حتة... ههه
بس احنا كنا عاملين الموضوع مزاااح وهظار ومكاواة.... حتى كنا بنتقسم عيال الجيران.. لدرجة الكان عمرو شهور كنا بنختو في اللستة... ما الظروف ما معروفة.... وممكن نربيهم يعني بعد نتزوجم مامشكلة..

والوقت داك اتعلمنا حركة الخشبة ( لم اتنين يقولو الكلمة في نفس اللحظة بيمسكو الخشبة... والبيمسك الخشبة اول بيعرس اول) طبعا هي حركات فرفشة ماليها علاقة بالواقع ابدا.... عموما طبقناها بحذافيرا تحسبا لان النظرية تكون بجد... يعني احنا في الثانوي بنااات كبااار وعاقلين ((المفروض يعني)) كنا نطلع المسا نتمشى قدام بيوتنا مشية وجية.... ونتونس بكل هدوء.... وفجأة نقول كلمة في نفس الوقت... في نص الشارع نفك الجري سبااااااق لاقرب شجرة.... والحظها حلو تلقى ليها فرع واقع قريب منها.... ولا حتة عويشة ولا قشة اسنان حتى.... المهم خشبة والمهم تعرس اول... وطبعا بعداك ندخل في نوبة ضحك لدرجة رجلينا ما يشيلونا....

الضحك الضحكتو مع الناس كلهم كوم والضحكتو مع نوسة كوم اكبر.... كنا بمجرد ما نعاين لبعض نضحك... وضحكة كل واحدة تزيد ضحكة التانية والضحك يعلا ويزيد وفي النهاية نكتشف اننا بنضحك على لاشيء.... وطبعا حدث ولا حرج عن الضحك في المواقف التي لاتتحمل ضحك... زي لم مشينا نعزي صاحبتنا في وفاة امها.... الموقف كان حزين لان اخوها اتوف من فترة قريبة وطوالي اتوفت امها وما باقي ليها الا ابوها واختها الصغيرة... كنا متأثرين لم مشينا بس الغلطة الغلطناها ان مشينا انا ونوسة سوا وكمان واحدة صاحبتنا اسمها لينا.... دخلنا عزينا وقعدنا جوة جابو الموية حامو بيها ادو الناس بس لم وصلوني كانت الموية انتهت.... مافي شي بيضحك في الموضوع دة انا عارفة.. بس للاسف سمعت نوسة بتهمهم... وفهمت انها بتضحك.... وبدون ما احس بديت اهمهم... ماهو الضحك بيني وبين نوسة عدوى لاااااازم تنتقل... كانت بينا لينا لكن ماقدرت تسيطر على الوضع بدت تهمهم معانا..... المرة ست العزا.. اخت المرحومة بقت تعاين لينا وتعاين لام نوسة.... كأنها بتقوليها شايفة بناتك بيعملو شنو..... واحنا ماقادرين.... لان اول ما واحدة ترخي وشها وتتمالك ضحكتها صوت الاتنين الجنبها ببوظ اي مجهود.... في النهاية خطرت لنوسة فكرة ذكية.... عملت الهمهمات دي كأنها بتبكي.... طبعا احنا اصلا كنا مدنقرين رفعت راسا فجاة ووقفت ومشت ختت كوباية الموية في الطربيزة وقالت لاخت المرحومة.... اهيء اهيء يا خالتو اهيء اهيء الحمام بي وين..... اشرت ليها على الحمام بكل اغتياظ... واحنا المنظر خلانا خلاااااااااص ما قادرين... فطسنا ضحك... بس لسة مدنقرين..... نوسة مشت الحمام ضحكت بكل ما اوتيت من قوة.... قال فاكرة كدة حتكمل الضحك ولم ترجع حتكون طبيعية... فعلا لحدي ما نوسة جات انا ولينا كنا اتماسكنا شوية واتخرسنا.... انا شخصيا حاولت افكر في اي موضوع برة الموقف الاحنا فيه.... ولم جات نوسة ما اتلفت ولا عاينت ليها عشان ما نضحك.. قعدنا عاقلين هاديين ساكتين لمدة دقايق كدة.... جات واحدة صاحبتنا تاني داخلة بيت البكا.... اخت المرحومة كانت ماشاء الله وزنها تقيل حبتين.... كانت قاعدة في السرير براها فقررت تزح للبت عشان تقعد جنبها.... لم زحت السرير طق.... ما وقع بس طق.... احنا هنا اتفتحنا فتح وما انسدينا
طوالي ام نوسة اشرت لينا قالت اطلعو برة.... قلنا للمرة مع السلامة وطلعنا.... وطبعا التهزيئة الاخدناها في العربية مافي داعي لذكرها....

طبعا بريتكم... خلاص اخر حاجة قربنا نخلص...

بعد ما جينا السودان سكنا بعيد من بعض واحنا الاتنين ما بنعرف نوصل لبعض.... ومافي زول فاضي يودينا.... بقى اتصالنا بالتلفون بس... شوية شوية التلفون زاتو بقى في المناسبات والاعياد بس... يلا مرة من المرات نوسة قررت تكسر الحاجز وتجيني... وفعلا جات مع خالها... وكنا في البيت انا وماما وخالاتي اتنين وولد خالتي... سلمنا وقعدنا وعرفناها بخالاتي... وفجأة انا ونوسة عاينا لبعض.... ودخلنا في نوبة من الضحك لدرجة ان الدموع بقت شلال..... طبعا الموجودين ماجاملونا ولا عبرونا.... بقو ساكتين ويعاينو لينا كأننا مجانين... نوسة عشان تتمالك الموقف قالت ليهم انا ما عارفة ليه لم اعاين لايمان بضحك.... وكملنا ضحك..

انتهت زيارة نوسة ومن اليومداك ما شفتها.... تقريبا 4 سنين ونص.... كل واحدة فينا انشغلت بحياتا اليومية ودراستا ونسينا الذكريات الحلوة... بس امبارح اتذكرتها واتيقنت ان ضحكتي بتعني نوسة.... ومتيقنة ان يوم ما اقابل نوسة حضحك من الصميم...

Bye Bye our kidneys

كل يوم والتاني نسمع فلان جاه فشل كلوي - حمانا الله - وفلان عندو التهابات وفلان عندو ترسبات وفلان بدا برنامج الغسيل... ناس تغسل مرة في الاسبوع وناس مرتين وناس يوميا... مراكز غسيل الكلي بقت ما بتتعد من كترتها... كل يوم فرحانين محتفلين بمركز غسيل كلى جديد.... ولسة بيموتو الاف مؤلفة بامراض الكلى... واغرب مافي الموضوع الحيرة البتكون بين الناس انو ليه الفشل الكلوي اتفشى بين السودانيين.... وفلان كان نصيــــــــح ماعندو اي مشكلة فجأة انهارت كليتو.... زمان كان الضغط والسكري المزمنين يعني بعد 30 سنة من بداية الاصابة يبدو يأثرو على الكلى وخلافها.. بس هس في لمح البصر الكلي بتنهار.... ولســــــــــــــــــــة الناس محتارة.... وبصراحة انا المحيرني حيرة الناس دي..... ماعارفاه جهل ولا تجاهل.....

عموما شوفو الصورة دي واحكمو براكم

ياترى ليه الفشل الكلوي انتشر؟؟؟؟

الكباية العلى اليمين دي مياه معدنية... واللي على اليسار دي ماسورة الحكومة :).... وملاحظة ان دي عبيتها من قبل ما تمر على الخزان عشان اشيل اي احتمال ان في صدا او طحالب في الخزان


أفتكر ان الصورة بتعبر عن نفسها

عيدكم مبااارك

كل ســـنة وانتو بخيــــــــر

والسنة الجــــــــاية على أمانيــكم

يارب ينعاد علينا واحنا أسعد وأطيب... وحياتنا أسهل وأحلى وأمتع

HaPpY BirthDay To "ME"

ليه لم اتم سنة جديدة بيحتفلو بي وبيغنو يصفقو ويباركو لي ان كبرت سنة... وليه بيكونو كل الحواليني مبسوطين وليه مفروض اكون مبسوطة اني كبرت سنة.... انا مقاعدة اكون مبسوطة... بالعكس بحس بالخووف... مش الخوف من الموووت زي ما ناس كتير بتخاف... أبدا... انا بخاف من الحاجات البتبقى مرفوضة كل ما أكبر.... كل الناس بتشوف السعادة في إنها تكبر وتتعلم وتحقق أمانيها وتنجح في حياتا وينادوها ب ألقاب اجتماعية تكبر الراس شوية... زي كلمة دكتورة وباشمهندس

أنا ماعاوزة أي لقب ولا عاوزة أنجح وأبقى كبيرة زي الباقيين... أنا عاوزة أكون طفلة أعمل العاوزاه بكل عفوية وبدون ما أتقيد ب ( رأي الناس فيني) عاوزة أضحك من قلبي بصوت عالي بدون ما يقولو لي عيب تضحكي كدة... حتى الضحكة بقى فيها أنواع... والبت الراقية بتضحك كدة.... ماعاوزة أكون راقية.... ما عاوزة أكون برستيج.... عاوزة أكون أنا وبس.... عاوزة أكون عفوية وطبيعية وأقول الجواي

ليه أفرح إن بكبر إذا كان كل الأكبر مني بيواسوني بيقولو لي ماتخلي كلمة من صحبتك ولا شاكوش من حبيبك يضايقك... الدنيا ياما حتوريك.... إذا كانت الدنيا ياااما حتوريني ولسة مستنياني هموم تكسر الصخر... طيب لـيـــــــــــــــــــــه أفرح لم اكبر؟؟؟

ليه أفرح لم أكبر إذا كان حتنزل المطر الأنا بحبها وكل احتفاليتي بنزول المطر إن أقيف جوة ورا الشباك أعاين ليها.... ليه ما أنزل ألعب بموية المطر وأستمتع بيها؟؟؟ لأني كبيرة.... لأني كبيرة ممنوع أستمتع... ممكن أشيل هموم زي ماعاوزة بس ما أستمتع ولا أضحك ولا أفرفش

ليه أفرح إذا كنت حأمشي الملاهي وأخجل أركب المرجيحة... ليه ما أركبا؟؟؟ لأن لو ركبت صحبتي بتقول لي أنزلي فضحتينا كبيرة كدة وبتتمرجحي.... لازم عشان أنا بت جامعية أكون رومانسية أمشي لحدي الملاهي واقطع تذاكر عشان أتمشى وأسمع هموم صحباتي مع حبايبم ولا مشاكلم العائلية وأرجع.... ولم أقعد أقعد برواقة وأرمش بسرعة بطيئة قدر الإمكان ولم أسمع نكتة أكتفي إني أبتسم بس وما ألعب ولا أتجارى زي العيال... ليــــــــــــــــــــــــــــــــه؟؟؟ لأني كبيرة

ليه ممكن أمشي شارع النيل أقعد جنب ولد سااعااااااااات نتهامس ولا زول ينتقدني لكن أسك صحبتي في لعبة غميضة يبقـى عيـــــــــــــــــــــــــــــــــــــــــــب والناس تشيل حالي وتعاين لي عشرة عشرة... ليــــــــــــــــــــــــــــــــــــــــــــــــه؟؟؟ لأني كبيرة

ليه لم أتألم أكتفي بإن أرخي عضلات وشي ولو بالغت وكان الموقف يسمح ممكن أطلق سراح دمعة أو دمعتين من باب منع الانفجار بس.... ليه ما أبكي لم أتألم وأطلع الحزن اللي دخل؟؟؟ ليه البكاء بيبك ضعف؟؟؟ مع إن الحزن موجووود بس بنضاريهوكل ما نضاريه أكتر بنكون أقوى.... ليه ما تكون القوة في إني أعبر عن الجواي بدون خوف وأطلق لأحاسيسي العنان..... أقل شي لو وجعتني يدي ولا رجلي ولا بطني وبكيت.... دي شنو العوارة دي... هس دة شي ببكي..... عيب.... طيب ليــــــــــــــــــــــــــــــــــه؟؟؟

لأن كبيرة

كل يوم بيعدي علينا بنفقد انسان عزيز.... بنفارق حبايبنا سواء للسفر أو لأن بنخلص من مرحلة دراسية ونبدأ مرحلة بعدها....

كل يوم بيعدي علينا بحرمنا من حاجات كانت مسموحة في اليوم القبلو... الممنوعات بتزداد لكن عمرها ((المسموحات)) مازادت

كل يوم بيعدي علينا بنتهالك وتزداد شكوانا تبدأ آلام الأسنان وضعف النظر وألم المفاصل وتقلصات الجهاز الهضمي وتقلبات الجهاز النفــــــــــــــــــــــــسي

كل يوم بيعدي علينا بيقربنا من دوامة العمل والجد وبيزيد المسؤوليات... وبيبعدنا عن الحياة المرحة وعن أصحابنا اللي كنا بنضحك معاهم

كل يوم بيعدي بيدخلنا في مرحلة مقارنة مع الأتراب على وزن فلان داك وضعو المالي بقى ممتاز وفلانة ديك اتزوجت وصحبتك الزمان عملت وولد جيرانك وبت عمك وولد فلانة وأخو علانة وقريب صحبتك وولد زميل ابوكي وووووووووووو ولسة بنحتفل إننا تمينا سنة جديدة

وكل سنة وأنا طيبة.... والسنة الجاية أكبر وأعقل

رمـضــــــــان كريــــــــــــــــــم

رمضااااااااااااان كريم.... طبعا عارفاها متأخرة بس والله غصبا عني... مشغولة مع الوالدة لأن مفروض تعمل عملية بكرة ان شاء الله

دعواتكم ليها عسى ربنا يشفي لينا مرضانا ومرضاكم

أنا والله نفسي أدعو الناس لعمل الخير أو أحاول أهدي وأنصح بس بحس إن ما بعرف... كل البقدر أقولو ربنا يهدينا جميعا ويقبل مننا ومنكم صيامنا وصلاتنا... وياااارب ما يجي العيد إلا واحنا أقوى إيمانا وأقرب إلى الله

ماتنسونا من الدعوات

ســـؤال

يارجلي يخالجني سؤال

أتراني أحتمل فراقا ً
أن أكتم شوقا ً مشتعلا ً
أن أمنع ولها ً دفاقا ً
أن تفصل بيننا أميال؟؟
يارجلي يخالجني سؤال

الخوف من الفرقى قاتل
والوحشة تظلم لي فجري
في قلبي لك حب هائل
واللوعة في جسدي تسري
هل كنت يارجلي تدري
أم كانت أحلامَ وآمال؟؟
يارجلي يخالجني سؤال

هل تجد في بعدي أمانا ً
أو تلقى من دوني حنانا ً
هل تطرى ذكري أحيانا ً
أو تذكر يوما ً ( إيمانا ً )
أم أنك في أحسن حال؟؟
يارجلي يخالجني سؤال

أتراك تعود لتحويني
لتبرر بعدا ً وغيابا ً
لتمحو دمعي وأحزاني
لتعطي قلبي أسبابا ً
أو حتى تعال لتخبرني
بأنا ما كنا أحبابا ً
يارجلي أخبرتك سؤالي
فهل تعرف يارجلي جوابا ً؟؟؟
يارجلي يخالجني سؤال

إحساس ما جميل إنك محل ما تقبل تتسأل السؤال التالي( أها مافي جديد؟؟) أو (مافي ارتباط في الجو؟؟) ليه فجأة الواحد بيوصل لعمر كدة بيحس إن كل المواضيع خلصت من الحوالينو ومافي موضوع يناقشوه غير مسألة بوووورة فلان أو عنوسة فلانة.....
والبيغيظ بجد لم تكون بت وتجي خالتها ولا عمتها تقول ليها ياخ مالو فلان ولا مالو علان!!!! ويكونو فلان وعلان أصلا ما اتقدمو ليها.... يعني أنا مطلوب مني شنو؟؟؟ لم ألقى لي واحد وجيه ومحترم أمشي أطلب يدو؟؟؟؟؟!!!!! خلاص حااااااضر بس أوع تقولو ولا كلمة لو عملت كدة


يلا بيزيد الضغط النفسي لم يرتبط زول قريب منك في العمر... واااي صدقوني زنقة ماحلوة أبدا....
ودة الحاصل لي حاليا

لأن


في حركة ماجميلة منو

ومستفزة لمشاعر المحرومين والبايرين أمثالنا أنا ودندونة بت عمي...


باااع الوجيه أيمن أيام العزوبية والفرفشة

ودخل في مرحلة انتقالية تسمى بالخطوبة...

وسابنا في وش المدفع

وأنا بكل روح مارياضية أبدا أبدا أبدا

ومن هذا المنبر

أهنيء الأخ أيمن

بمناسبة خطبته

للآنسة زينا

وبتمنى ليهم

خطوبة هادئة ورومانسية

وزواج قريب وسعيد

وبيت مال وعيال


ملاحظة: زيادة في الاحساس بالبورة عاوزة أقوليكم إن المدعوة زينا دي أصغر مني بأربع سنوات هههه

ماذا بعد ثلاثية الهلال

أول حاجة معلومة عاوزة أوضحا إن أنا ما عندي أي اهتمام بالكورة... ولا بفهم فيها نهائي.... بس لحكمة ربانية اللية غيرت نظرتي للكورة..... طبعا زي ما أيمن قاليكم ان في مفاجأة سعيدة بنحضر ليها.... ووقت مباراة الهلال السوداني مع الأهلي المصري كنا في السوق الشعبي بنشتري حاجات للمناسبة دي.... لاحظت إن أغلب الدكاكين مقفولة وفي هدوء شديد بيسود على السوق.... مع ان في أي مرة تانية بيكون السوق برنامج مزعج من شدة الزحمة والاحتكاكات والمضايقات.... كنا بنختار في البضايع وفجأة من وسط السكون أسمع السوق كلو في نفس واحد...

قووووووووووووووووووووووووووووووووووووووووووووووووووووون

.....
وبعدو كواريك وهتافات وفرح شديد كأنو كان ميت ورجعت فيه الروح.... اتلفت لأيمن ولقيتو تبع الجماعة الفرحاين... اتذكرت إن ما كل الناس جاهلة في الكورة زيي...

عموما ابتسمت لأيمن ورجعت لموضوع الاختيار وطلعنا من الدكان مشينا للبعدو.... طبعا نسيت أقوليكم إن بعد الصيحة اللي دوت قبيل فجأة حل السكون تاني بسرعة رهيبة.... الناس دي عجيبة خلاص....

يلا واقفين قدام دكان تاني بنحاسب في التاجر وفجأة تاني

قووووووووووووووووووووووووووووووووووووووووووووووووون

وبتاع الدكان انفعل معاهم وأيمن كمان اتهلل وجهو والفرح تاني عم السوق.... الراجل بتاع الدكان اشترينا منو ورد مجفف ب 15 جنيه من الفرحة رجع لينا 5 وشال العشرة بس... يعني 33% ديسكاونت... ياسلااام ياريت الهلال يجيب عشرة أقوان....

خلصنا من السوق واتحركنا باتجاه البيت... أيمن مبسوط... مشغل أنوار الخطر ويلعب بالبووري ويشاغل العربات التانية..... والمعلق الرياضي في الراديو بينقل تفاصيل المباراة

و

قوووووووووووووووووووووووووووووووووووووووووووون

وهنا بصراحة حسيت إن لازم أحب الكورة وقررت أعيد نظر في الموضوع...يعني إذا كانت الكورة مصدرة فرح طيب مالو ما أفرح مع الفرحانين.... ليه نقفل باب الفرح إذا كان تأثيرو سريع وقوي كدة...ومن هنا بديت أحب الكورة... أول خطوة كانت إن ركزت في التعليق الرياضي وبالأمارة المعلق قال: ((ماذا بعد ثلاثية الهلال)) بصراحة العبارة عجبتني وحسيت باندماج... خلاص حأحب الكورة وحأبدأ بالهلال ولاحقا حأشوف مستوى المريخ وأقرر أشجع أي واحد... خلاص اتخذت قراري وراجعين مبسوطين وبنزمر بالبوووري والكنتاكات شغالة عشرة على عشرة.... وقفنا في الإشارة... وقف جنبنا بتاع هايس راكب برااه ورافع علم الهلال بالشباك... أنا وأيمن عاينا ليه وضحكنا معاه.... وحتى جا شرطي المرور صفر بالصفارة على وزنة البوري بتاعنا... ماكان من أخينا بتاع الهايس إلا أنو يقول: أيوة كدة الروح الرياضية
اكتشاف خطير... فاكرنا مصريين... ضحكنا وعديناها وفتحت الإشارة واستمرينا في سكتنا واحتفاليتنا... قررنا نشتري عشا واحنا راجعين ونحتفل في البيت لأن معنواتنا كانت مرتفعة والحمدلله.... مشينا جنب مطعم قريب من بيتنا وبصراحة أكلو ظريف.... وإذا بالتقاطع مقفووول... خنقة مرورية فظيعة.... الناس قالعة القمصان وبتلوح بيها في نص الشارع ومساطيل وسكرانين وحاجات عجيبة.... طبعا أيمن طواااااااالي قرر إن ما حيقيف قدام المطعم لأن ماممكن ينزل ويسيبنا بنات برانا في موقف زي دة... والحمدلله إن ما نزل... لأن في اللحظة دي واحنا بنجاهد عشان نطلع من الزحمة بدون أي خسائر دخل لينا راجل بالشباك بتاعي ويبدو إن لم يذق طعم الأخلاق ولاالتربية.... قال ليه كلام تافه زيو كدة وطلع.... طبعا احنا حسينا بورطة.... إذا الناس فاكرانا مصريين والناس أغلبها سكرانة وماواعية... سواء بفعل الفرحة الشديدة أو تحت تأثير العرقي والمريسا....حيحصل لينا شنو ياترى؟؟ يعني إذا واحد لفت نظر المجموعة إن السيارة دي فيها (( مشبوهين)) قصدي (( مصريين)) حيحصل شنو ياترى!!!!ماتحاولو تتخيلو لأن الخيال براه بينشف الدم... طبعا الأخ الكريم نكد علينا وبقينا خايفين وعاوزين نوصل البيت بالسلامة.... أيمن كان مبسوط فعلا بالفوز بس لحظتها بقى كل همو مايفتكرونا مصريين.... بقى يدوس البوري ويسوق بأسرع ما يمكن وأنا أصفق وأكورك... والحقيقة إن لم أكورك كنت بقول (( عاوزة أمشي البيييت عاوزة أمشي البييييت)) بس لأن الخلق كلها بتكورك فكانو فاكرني بهتف للهلال.... وصلنا البيت ودخلنا العربية في الجراش وقفلنا كويس....

طبعا دخلنا مخلوعين وحكينا لناس البيت الحصل وقعدو يضحكو.... واحنا ضحكنا معاهم لأن خلاص وصلنا بالسلامة ورجعنا لبرنامج المفاجأة....

طبعا برنامج العشا من برة كان داخل مزاجنا في اللحظة دي وقمنا طلبنا ديلفري.... ولم جا العشا نزل أخوي الصغير يستلمو وإتأخر... وهنا لعبت الشياطين بماما... وأوحى لها خيالها بأن الجماعة السعيدين اللي في الشارع افتكروه هو كمان مصري.... نزلت ليه ودخلتو وقفلنا الباب كأنو في حرب برة

الحمدلله عدت الليلة بدون خسائر بس لحدي اللحظة دي كل ما أتذكر لحصل والكان ممكن يحصل بحس إن دمي بيغلي... يعني الواحد في بلدو مامرتاح وبرة بلدو مامرتاح

ملاحظة.... آخر قرار صادر عني أنا المدعوة إيمان وأنا أقر إني بكامل قواي العقلية

أنا بكره الكوووووورة ولا أطيقها ولن أحاول إن أهضمها تاني أبدا

......

تصبحو على خير حاليا

وللحديث بقية

بقول نبعد

بقول نبعد
ونار الشوق تقيد في حشاي

بقول نبعد
وكيف تبعد وانت هواي

انت الريد وانت الحب
انت سراج يضوي دناي

انت اللحظة في بعدك
تزيدني عذاب.. تزيد في قساي

وااي أنا وااي
وااي من بعدك المحبوب
في بعدك شرار حارق يشع جواي

ماتبعد
ماتبعد انت حياتي انت مناي
ماتبعد وقت أبرد بتبقى دفاي
وقت أشكي ووقت أبكي
وقت أحتاج.. انت دواي

.....انت الدنيا يا
ماتبعد تسيبني براي

كتبت يوم الجمعة 27-7-2007
الساعة 11:15 مساء