صباح الخير
طبعا أنا لسة باقي لي إمتحان أخير بكرة إن شاء الله.... بس الموضوع دة غلبني وما قدرت أصبر لي بكرة
فقررت أكتبو هس يمكن شوية أرتاح وأركز في قرايتي
الحكاية ومافيها إن أقرب صاحبة لي في الجامعة لم تحب تخفف دمها وتتظارف بتقول لي ياحلبية يامقطعة أو عاينو الحلبية المعفنة دي ... المهم لازم تدخل كلمة حلبية مع شتيمة وتضحك بعداك وكلمة حلبية للما بعرفا بتطلق على السودانيين اللونم أبيض عشان في جماعة لونم أبيض أصلهم من مدينة حلب السورية استوطنو السودان من فترة فبالتالي بقى أي أبيض من أي قبيلة حلبي.... أنا قصة حلبية دي ماعندي معاها مشكلة شديد وبالذات ان بيني وبين صاحبتي مافي زعل ولا حساسية....بس بيغيظني الكلمة البعدها... يعني وكأنو أي أبيض معفن أو أي أبيض مقطع (( بخيل))
كنت ساكتة على الموضوع دة لحدي ما كنا في الجامعة من فترة بنتناقش في موضوع القبائل.... صاحبتي محسية ومعانا ولد جعلي وولد شايقي من دفعتنا..... كنا بنتونس وكل زول بيكاوي التاني بعيوب قبيلتو.... وفجأة سألوني من قبيلتي.... وريتم قبيلة الوالد وقبيلة الوالدة.... وبما إننا من ما جعليين ولا شوايقة ولا رباطاب ولا محس فما كان من الجماعة الا انهم اتفقو على اني ما سودانية.... اتهموني بأني مصرية ومتسلبطة في السودانيين ساي المصيبة إن اتسلبط فيهم على شنو؟؟؟؟؟؟!!!!!!!!! هو من حلاتو السودان دة ولا من الكرم البنلقاه في المطارات لم يشوفو الباسبورت السوداني... ولا من حسن سمعتنا بين الدول التانية.... يعني أنا لو كنت مصرية هل كنت حأفكر أبقى سودانية؟؟؟؟
الخلاني أكتب الموضوع دة إني مغيوووووووووظة.... يعني المجتمع الدولي محتار هل السودان فيه عنصرية ولا لا......... انا بقوليهم فيـــــــــــــــــــــــــــــــــــــه... مش عنصرية في تقسيم السلطة والثروة.... الكلام دة كبير علي وما بفهمو بصراحة....ولا بحب أتكلم فيه.... بس انا بشوف العنصرية اجتماعية..... ومرضية...... يعني مافي سوداني مرتاح.... الغرباوي أو الجنوبي بيعتبروه عبد.... لا وكمان من يومين سمعت لفظ جديد (( فرخ أو فريخ للتدليل يعني)).... مهما كان مركزو ومهما كانت ثقافتو ووظيفتو لم يتكلمو الباقيين عنو بيقولو فلان داك (( العبد))
وبيستحضرني موقف حصل لي في الجامعة... بيدرسنا دكتور غرباوي (( من غرب السودان)) ويوم نازلة من القاعة لقيت مجموعة من زملائي متلمين في اجتماع سري حوالي 10 أشخاص كدة... كان واضح ان في شماااار حاصل.... وأنا طبعا لا أقاوم الشمارات غريزة نسائية مشيت ليهم وقفت معاهم وسألتهم في شنو.... ردو علي إن الدكتور الفلاني هو الحيخت لينا الإمتحان.... قلت ليهم ياتو؟؟؟ قعدو يوصفوه وانا مابعرف اسمو... فجأة قلت ليهم الغرباوي؟؟؟؟ واذا بالجوطة الكانت حاصلة والاصوات الكانت بتلعلع كلو اختفى كأن وقعت عليهم صاعقة.... وبدو يلكزوني ويغمزو لي... أتاري معاهم في المجموعة ولد غرباوي.... واعتذرو ليه بالنيابة عني... وأخدوني على جنبة وقالو لي دة شنو الهببتيه دة.... أنا ماعارفة انا هببت شنو!!!! يعني هو فعلا غرباوي... وغرباوي هنا دي جنسو مش شتيمة.... ليه هم ارتبطت ليهم الكلمة دي بالشتيمة والإساءة.... الله المستعان
نرجع لموضوعنا... قلنا لو إنت غرباوي أو جنوبي فبالنسبة للناس انت عبد.... والعبيد مهما حصل ومهما اترقو ماليهم أمان.... وماعندهم ذمة ولاضمير.... الخ
لو إنت شايقي معناها إنت بخيل وراجل (خايب) معليش في الكلمة دي.... لأنو بيقولو المرأة الشايقية (( جريئة وعينها قوية)) وبالتالي شخصية الرجل الشايقي ضعيفة قدام مرتو...
طيب لو إنت جعلي إذا إنت أحمق وعقلك صغير.... والمرأة الجعلية مغروووووورة وفاكاها في روحا
رباطابي معناها مسيخ ولسانك زي السم
حتى لو قلت نكتة برضو انت مسيخ
طيب أهل العوض مع أهل الشرق بصفة عامة... ناس متخلفين ماعندهم برستيج بتعريفة... استغلاليين ودمهم تقيل
وهكذا دوااااليك
بجد حاجة تغييظ.... الشي المعروف ان طباع الواحد مرتبطة بشخصيتو هو... وبالتربية اللي اتربى عليها.... وممكن يكتسبا من المجتمع العاش فيه.... يعني اسم قبيلتك بعيد كل البعد عن شخصيتك... يعني لو أصلك من الغرب (( حتى لو عمرك ما مشيتو)) ما معناها ان ماعندك ذمة وماليك أمان.... يعني هو مافي غرباوي ملتزم وبيعرف ربنا؟؟؟؟!!!!!
ولا مافي شايقي شخصيتو قوية؟؟؟؟
بعدين سؤال محيرني.... لوالجنوبي والشمالي وأهل الشرق والغرب بيعانو من العنصرية والسب والشتم.... منو العنصري في الموضوع بالظبط؟؟؟!!! منو هو السوداني ال100% مافيه عيوب وقاعد يعيب في الباقيين؟؟!!!!
حاجة تاني مرتبطة بالموضوع دة...
شرايط النكت... ناس محمد موسى وفرقة تيراب والجماعة الطيبين... أيوة هم ظريفين وبيسلو الواحد بس ممكن يكونو ظريفين بدون تجريح وإساءة.... يعني بدل ما يقولو رباطابي عمل ممكن يقولو واحد مسيخ عمل وبكدة ينسد باب من ابواب العنصرية....
وكدة لم نكون بنسمع نكتة ما يكون واحد من الموجودين عاوز يبكي من الزعل او يطق فيه عرق.... يعني والله الدنيا اتغيرت والناس طلعت من قوقعة الحلة والقرية وثقافتا اتوسعت.... فما صح البنعمل فيه دة...... ماصح نعمم..... لأن اللون ما بعيب زول والاسم ما بعيب زول.... البعيب الانسان جهلو وسوء خلقو..... وأنا بعتبر أي واحد (( بيهبل)) و (( بيسيء)) بانسان تاني هو في شخصو انسان ضعيف وبيغطي عيب فيه....
وبعدين ليه أي واحد لونو أبيض حلبي مقطع وأي واحد لونو أسمر عبد.... طيب هو الناس ممكن تكون شنو غير اللونين ديل؟؟!!
اتذكرت مثال للحاجة دي هس.... موقف تاني حصل لي في الجامعة...
في طالب عزيز علي جدا في الدفعة.... طيب ومتواضع وقلبو أبيض زميلي دة لونو أسمر غامق شويتين... بس بأمانة أنا ما بعرف هو جنسو شنو.... ولا فارق معاي يعني... لأن رأيي فيه اتكون نتيجة تعاملو الراقي وماليه أي علاقة بالأصل.... عموما تصادف إن بيحب الانترنت ومدمن زي حالاتي كدة.... فقررنا إننا نعمل موقع غير رسمي لجامعتنا... يكون زي ملتقى للطلبة ومنتدى وصفحة أدبية والخ.... وأخدنا يومين كدة طالعين نازلين مع بعض نصور المكتبة والمباني والدكاترة والمدخل والخ.... عشان التصميم بتاع الموقع... واحنا نازلين من الادارة لاقانا واحد تاني من زملائنا.... من شافنا ماشين سوا جا علينا وهو فطساااااااااان ضحك.... وفي نص ساحة الجامعة قال لينا (( شنو اللم الشمال مع الجنوب)) وفطس على نفسو ضحك..... طبعا زميلي اتحرج من الموقف وانا اتحرجت من احراج زميلي... ماعلقنا للولد وطنشناه ومشينا...
تاني يوم لقانا ماشين مع بعض تاني جرى علينا وقال بصوت عالي مسموع... أنا نفسي أفهم إنتي شنو العاجبك في العبد دة؟؟؟!!!!
اتخيلو الاحراج
تاني يوم ناديتو على جنب وقلت ليه ان الحركة اللي عملا امبارح كانت بااايخة وعنصرية ومحرجة والخ.... وبأمانة كنت معصبة عليه.... ويمكن دي غلطتي
عمل شنو حضرتو؟؟!!! طلع من القاعة... نادى زميلي دخلو القاعة.... خت يدو على كتفو... وقال لي:
انتي زعلانة عشان قلت عليه عبد؟؟؟؟ طبعا سكت ومارديت... اتوقعتو يعتذر...
واصل كلامو وقال شنو؟؟؟ قال ماهو فعلا عبد..... وانا تاني بسألك انتي شنو العاجبك في العبد دة؟؟؟!!!... وطبعا كان أسوأ لحظة مرت علي..... شلت شنطتي وطلعت من القاعة... لأن خفت لو قعدت ثانية تاني زميلي ينفعل ويضرب الولد وطبعا دي فيها رفد من الجامعة....
طبعا احنا المواقف دي بتمر علينا يوميا وأكيد في زول بيتألم فيها... يعني لو واحد جعلي حكى لشلة من اصحابو نكتة عن الشوايقة وتصادف ان بينهم واحد شايقي.... حيضحك عشان ما يقولو عقلو صغير... بس لابد انو من قلبي بيتضايق.... لان بحس انو هو المقصود
وقيسو على كدة كتير
أأه أنا كدة شوية ارتحت وقلت اللي جواي
الحمدلله
