قطار الشوق

صباح الخير

عاوزة أسألكم منو شاعر أغنية قطار الشوق الغنوها البلابل وحسين شندي وغيرم كتير؟؟؟ولو ممكن برضو عاوزة أعرف كتبا سنة كم والقصة كانت شنو؟؟؟ ولو في زول بيعرف الشاعر شخصيا ياريت يكلمني عشان انا عاوزاه في كلمتين

بالنسبة للشاعر\علي محجوب فأنا سمعت إن ماهو الكاتبة... وإنو اشترك بيها في مهرجان في التمانينات وهي ماحقتو... انا بعرف الطرف المتهمو شخصيا فعاوزة اوصل لعلي محجوب عشان اعرف منو الحقيقة.. او حتى لو في زول بيعرفو يسألو

الكلام القالو لي قريبي وبالمناسبة هو مهندس خريج جامعة الخرطوم سنة 78قال انو كتبا وكان مقصود بيها كسلا ما عطبرةوكان طالب الوقت داك... كان عندو صديق اسمو كنكور تقريبا كان فنان مغمور في عطبرة... شال منو القصيدة ولحنها وغناها بس يبدو انو ما اشتهر... وقريبي اغترب وسافر وبعد سنين راكب مع واحد في العربية في الغربة شغل شريط البلابل أو حسين شندي المهم انو سمع الغنية... فقال للزول المعاهم تصدق ان الغنية دي كاتبا انا... وعملوها ونسة ويازول ما بصدق والكلامات دي وانتهت الونسة وبس تاني ما اهتم بالموضوع...يلا من كم سنة جا السودان وجاهو واحد من زملاء الدراسة في البيت... وتصادف انو اولادو كانو مشغلين الغنية بصوت عالي... فالضيف علق على جمال الغنية... وقريبي قاليه ان هو الكاتبا وحكى ليه القصة... زميلو ساقو طواااالي لي صحفي ونشر الموضوع في جريدة (( وانا محتفظة بالقصاصة بتاعت المقال)) وطالبو علي محجوب يرد... بس ما رد وتاني قريبي رجع لي الغربة ونسى الموضوع هس كنت بتونس معاه وهفت لي اسالو مباشرة... وحكى لي إن الغنية ياها بس فيها اضافات بسيطة... وقلت ليه انت اديتا لمنو... قال اداها لي اتنين من اصحابو... واحد كان بدرس جيولوجيا وحاليا هو عميد الجيولوجيا جامعة النيلين والتاني اسمو كنكور... بس الأداها لي علي محجوب منو مامعروف فأنا عاوزة لو زول بيعرف علي محجوب يسمع منو الحصل شنو بالظبط لأن الموضوع حارقني بصراحة وغايظني أكتر مما غايظ قريبي

ياترى في زول بيقدر يساعدني في الموضوع دة؟؟؟؟

المرتزقة ((أبو الفلفسة زاتو))

آآآآآي عارفة إني متأخرة عن الركب كالعادة
بس واللـــه كنت مشغولة... وماحكيت ليكم عن ضربة أم درمان....
أنا بصراحة ما عاصرت شي غير التلفزيون... يعني زينا زي الناس برة السودان... بس الفرق إن احنا خفنا والبرة السودان ما خافو...
بمناسبة الناس البرة السودان أنا اكتشفت إن الخبر كلو ما يبعد من مصدرو بيوسع حبتين... يعني أول يوم قالو مسكو أظن 100 عربية أو بالحدود دي.... الخبر وصلنا في الخرطوم من زملائي سكان أم درمان إن حوالي 200... واستمر الرقم بالتزايد كل ما بعد المصدر عن أم درمان... وطبعا الوالدة (( زي ما قلت ليكم كانت مسافرة)) ضربت لينا تلفون بتطمن علينا... وقالت لي صحي قالو مسكو 1000 عربية!!!!!!!!!!!!!!!

هههههه

يلا طبعا حظرو تجوالنا (( عربي تماااام)) واتحبسنا في بيوتنا... ودي كانت إجازة كويسة بالنسبة لي لأنو كان في ضغط شديد علي من تحمل مسؤولية البيت والبزنس حق الجماعة والقراية وتوصيل أختي الجامعة والخ الخ الخ (( طبع النسوان بيحبـــــــــن الشكاية زي عيونن))

المهم بعد فكو الحظر نزلنا الجامعة وخايفيــــــــــــــن من الحاصل ويلا أنا قدام الجامعة ماشة أركب العربية ألقى ليك موقف غريب... اتنين (( شكلهم غرباويين)) واحد نضيـــــــف والتاني مبهــــــــــــــدل وقفو قدام المكتبة.... النضيف قال للمبهدل كلام انا ما سمعتو بس الفهمتو من حركات يدينو ووشو ان قال ليهو اقعد هنا انا بضرب تلفون واجيك... (( يا إما أنا عندي قدرة على التحليل المنطقي أو خيالي واااسع)) وفعلا داك قعد في المصطبة وبقى يتلفت يمين وشمال بخوف كدة... يازووول أنا قلت الليلة لازم أحضر الفيلم كامل (( مجنونة مش كان أدور عربيتي وأمشي بيتنا وأقول أنا مالي!!! يعرفوني شمشاااارة كيف))...المهم مشيت عملت نفسي داخلة المكتبة الجنبو... ووقفت في الباب عاينت ليه شوية... الزول خايف وتعباااان ومغبر غبار ما طبيعي... وفجأة انتبه لي... كيف ما ينتبه لي إذا كان مافي زول حولنا... الناس ما طلعت من بيوتا... عاين لي جوة عيوني... وسبحان الله ما خفت (( مع إني في الأصل جبااااانة)) لاحظت إنو عيونو صفر زي الجماعة الجابوهم في التلفزيون (( المرتزقة)) قلـــت بس ياهو زااااااااااتو... اتلفت على المكتبة لقيت سيد المكتبة ناديتو... جاني برة... قلت ليه برااااحة عاين للزول دة شكلو من الجماعة.. وقف.. عاين ليه... عاين لي تاني... ابتسم... ماعرفتو قاصد شنو... هل ابتسامة بمعنى (( اي والله ياهو)) ولا ابتسامة بمعنى (( بطلي وسوسة يا إيمان)) بس قلت ليه نبلغ؟؟؟ اتردد شوية وتمتم كدة وفي اللحظة دي الزول النضيف جا طالع من المكتبة التانية وقال لصحبو كلام ومشو.... خلاص مشو يعني مافي فايدة أبلغ... قلت لسيد المكتبة خلاص أخير نمشي بيوتنا.. قال لي أأي أنا زاتي حقفل المكتبة وأرجع الوضع ما أمان... فعلا مشيت على عربيتي... وبس هفت لي أعاين وراي للزول الكنت ناوية ابلغ عنو... اتلفت لقيتو بعاين لي
تفتكرو بعداك استنيت!!!! في خلال 5 ثواني فتحت العربية دورت وهربت... (( خووووف شديييد))

أها هس المقدمة دي كلها بس عشان أقوليكم إني مشيت معرض الأسلحة حق أم درمان وجبت ليكم كم صورة من الحاجات العجيبة الشفتها

يلا نتفرج سوا

لاترمى إلا الشجرة المثمرة

مساء الخير


أول حاجة عاوزة أطمن كل الناس الفقدوني وسالو عني إني بخير وبأمان... كل القصة إن كان عندنا ضيف غالي على قلبي الأسبوعين الفاتو فإنشغلت وما دخلت النت... وسافر أول امبارح وبالتالي رجعت لسابق عهدي في إدماني


بأمانة أنا ما كنت ناوية أكتب حاجة الليلة... لأن تعبانة ونعسانة وزهجانة حبتين.... بس في حاجة استفزتني وماحأقدر أنوم لو ما قلت العندي


القصة إن فتحت العداد بتاع الزوار للفترة الكنت غايبة فيها... لاحظت إن في يوم 22-5 عدد الزوار اتضاعف 3 مرات من العادي... غريـــــــــــــــبة... شكيت ان في مكان نزل موضوع عن صفحتي... مشيت قوقل وعملت بحث ووصلت للمكان إياه


منتدى سوداني فيه انتقاد لواحد من بوستاتي... بالتحديد لبوست العنصرية





قريت الموضوع والردود وحاسـة إن مغيوووووووووووظة.... وعاوزة أرد عليهم واحد واحد





يلا نقول بسم الله الرحمن الرحيم





أول حاجة المنزل الموضوع أبوشكيب





كاتب


الحكاية ومافيها إن أقرب صاحبة لي في الجامعة لما تحب تخفف دمها وتتظارف بتقول لي ياحلبية يامقطعة أو عاينو الحلبية المعفنة دي ... المهم لازم تدخل كلمة حلبية مع شتيمة وتضحك بعداك وكلمة حلبية للما بعرفا بتطلق على السودانيين اللونم أبيض عشان في جماعة لونم أبيض أصلهم من مدينة حلب السورية استوطنو السودان من فترة فبالتالي بقى أي أبيض من أي قبيلة حلبي.... أنا قصة حلبية دي ماعندي معاها مشكلة شديد وبالذات ان بيني وبين صاحبتي مافي زعل ولا حساسية....بس بيغيظني الكلمة البعدها... يعني وكأنو أي أبيض معفن أو أي أبيض مقطع (( بخيل))
كنت ساكتة على الموضوع دة لحدي ما كنا في الجامعة من فترة بنتناقش في موضوع القبائل.... صاحبتي محسية ومعانا ولد جعلي وولد شايقي من دفعتنا..... كنا بنتونس وكل زول بيكاوي التاني بعيوب قبيلتو.... وفجأة سألوني من قبيلتي.... وريتم قبيلة الوالد وقبيلة الوالدة.... وبما إننا من ما جعليين ولا شوايقة ولا رباطاب ولا محس فما كان من الجماعة الا انهم اتفقو على اني ما سودانية.... اتهموني بأني مصرية ومتسلبطة في السودانيين ساي المصيبة إن اتسلبط فيهم على شنو؟؟؟؟؟؟!!!!!!!!! هو من حلاتو السودان دة ولا من الكرم البنلقاه في المطارات لم يشوفو الباسبورت السوداني... ولا من حسن سمعتنا بين الدول التانية.... يعني أنا لو كنت مصرية هل كنت حأفكر أبقى سودانية؟؟؟؟-------------------------.....
طبعا لشىء فى نفس يعقوب لهفت ليكم الكلام الفوق ده من هنا :http://emoo-83.blogspot.com/2008/02/blog-post.html



لاحظو إن عمل نظام (( ولاتقربو الصلاة...))
عاوز يعمل جوطة من مافي
يعني يا أستاذ أبو شكيب كان تنقل الموضوع كلو عشان يعرفوني أحسن من كدة... ولا باقي الموضوع ما بيخدم الغرض الابليسي الفي راسك.... بالله لو عاوز تطلع لي فوق ما تركب على كتوف الناس...



اول رد كان من واحد اسمو مصطفى عثمان...
شكلو ماشاف الرابط طوالي قرا الكلمتين النقاهم ابوشكيب ورد على اساسم
كاتب

يعني أنا لو كنت مصرية هل كنت حأفكر أبقى سودانية؟؟؟؟
-------------------------
ده دليل على ضعف انتماء صاحبة المقال للسودان

أولا بقوليه كان ممكن ترجع للمقال وبعداك تحكم على انتمائي... ثم تانيا أنا ما قلت ان بتمنى اخد جواز مصري ولا غيرو... أنا قلت ان لو كنت مصرية ما كنت حأتسلبط في السودانيين... ودي الحقيقة... أمسكو ليكم مصري وأسألوه.... كل واحد بيشوف بلدو أحسن بلد... يعني المصري بيشوف مصر أم الدنيا... زي ما حضراتكم شايفين السودان أروع بقعة في الكون.... يعني أنا لم كتبت الجملة دي كنت مغيوظة من زملائي القلت ليهم (( أنا سودانية)) وقالو لي إنتي(( مصرية متسلبطة في السودانيين))


عضوة تانية اسمها حبيبة سودانية
ردودا كانت كالآتي

الرد الأول



ما غالبنى امرق بسبور مصرى لكن ابدا ما بدلة هويتى السودانيه بالمصريه وحسى لمن يسئلونى ياتو بلد فيهم احلى بقول ليهم بلدى السودان انا لو بالغت بقيت بقعد فى مصر اجازه اسبوعين وفى الثالث بحس انى مخنوقه برغم عندى اهل ومعارف فيها لكن ما بحس انى انا الا فى بلدى شعور ما اظن حيفهموا الا الاغتربوا فى الخارج ومهما طال الزمن بيهم وكبروا بيحسوا ان فى حاجه اساسيه نقصاهم وهى الانتماء والانتماء ما معناتو ناس الانتماء لهويه وارض ووطن

الرد التاني


برغم فى بلدى ما معتبرينى سودانيه لكن يكيفينى احساسى انى فيها وبين اهلى الما معتبرينى منهم عشان لسانى معوج بهويات كتيره
((وراصة 5 وشوش بتبكي))


الرد التالت


عارف من ايام فاتت مشيت حفلة عيد ميلاد لمصريين معارفنا هنا وقعدنا وكان زوجة واحده فيهم جات اول مره من اسبوعين اها لمن بدينا نتناقش وكيف البلد معاكى احساسى بانها شايفه ان مافى متعه هنا فى بلدنا فرسنى وطلعت هى ما مرقت من شوارع العمارات قولت ليها انت اصلا ما شوفتى البلد عشان تقدرى تحكمى وتقارنى بينها وبين مصر واتحمقت ودمى فار قربت اقوم انتفاضه وفى لحظات زى دى بعرف قدر شنو انا بحب وطنى واقل حرف من غريب فيها بيثير فينى الغضب والحماقه انى ادقه يعنى نحنا كسودانيين لو نبذنا بلدنا ما بتفرس قدر ما زول ما سودانى يقول فيها بيخ بتمنى اعضى فى فاخورته



الرد الرابع

ردت على التعليق دة
Originally Posted by شلولو
دا منو السجم الما بعتبرك سودانية ، اتا سودانية وكمان جعلية

كتبت

محسيه يا فرده

كتيرينخالص وكمان لمن يحبوا يفرسونى بيقولوا لى يا مصريه فى بورد مره فى اجتماع كانت ضيفه يا زميله لا اذكر قالت المصيبه الحاصل ان حبيبه سودانيه طلعت ما سودانيه عشان لسانى المعوج

الرد الخامس

Quote:
Originally Posted by امل
حبيبه انت حبيبة السودانيه خليك دائما ذي ما انت ما تاثر فيك اي تلميحات سخيفه واحنا يكفينا اسمك دي حتي لو لسانك اتلولو بميت لهجهBe
you always dear


ردت

تسلمى يا سكره والله اسم على مسمى اديتنى امل فى التصدى للتصرفات دى دا حتى البايعين لمن اجى اسئل على حاجه ويلاقوا لسانى معوج هاتك يا نقوره ويردوا عليه بالمصرى قبال كده عملتها فينى مدرسه فى الجامعه وبالجد اى زول يحاول يكلمنى مصرى بسيبه وامشى لانى سودانيه وبفهم سودانى سمح ربنا يخليكى رفعتى لى معنوياتى

بالله يا اخت حبيبة ماكان تقولي أنا بت حلبية وعسولة ودلوعة وحنكوشة وبحب السودان مووووووووووت وتريحينا.... ياخي عرفناكي وطنية وحب السودان بيجري جوة دمك بس بالمناسبة أنا اتولدت واتربيت برة وماجيت الا للجامعة (( برغم ان اتقبلت في جامعة الامارات وزي ما معروف الدراسة فيها اقوى من جامعات هنا بمرااااحل وكمان مجانا بس برضو اخترت ارجع السودان واتعصر على اهلي شوية)) المهم يا آنسة لساني الحمدلله ما معووج ولا يوم حاولت أتفلهم على البياعين والناس البسيطين وأتكلم سوداني مكسر... أهم شي الواحد يكون واثق في نفسو وما يفتش للمظاهر


رجع أبو شكيب كتب

لكن فى حاجة مهمة برضو مرات الهظار مع الصديقات مثلا لو عندك صاحبة حلبية وبتهظرى دائما معاها زى ما قالت الكاتبة وتقولى ليها يا حلبية يا معفنة مثلا كده تكونى بتدفعيها للتخندق مع الاخرين ضد السودان دون ان تقصدى ذلك ...وده هدف من اهداف البوست الاساسية

والله تراك كويس وفهمت قصدي من المكتوب
مالك طيب من الأول



أبوشوشو كاتب


يعني أنا لو كنت مصرية هل كنت حأفكر أبقى سودانية؟؟؟؟
دي فعلاً حلبية معفنة وكمان غبية

هس الغباء في كلامي ولا في عدم فهم كلامي؟؟؟؟؟؟؟؟
عموما... كل إناء بما فيه ينضح


الرد البعدو من New Sudan
كاتب


دي مفروض يسحبو منها الجواز عشان نشوفها حتقبل على وين . للأسف في ناس سكنوا السودان أيام العز لكن أولادهم و أحفادهم بيتبرؤوا من السودان عشان الظروف الحالية حاجة طبيعية في أي دولة متعددة الأعراق الأندماج في المجتمع بيحتاج إلى وقت و شوية عزلة عن الأصول


انت لو بتحب السودان ومقتنع بيه ليه مسمي نفسك New Sudan
وبرضــــــــــــــو انا ما قلت ان ما بحب السودان ولو رجعت لكتاباتي بتفهم أكتر


وآخر حاجة جاني اتصاف من عضوة اسمها سلسبيل

كتبت


السلام عليكم البنيه دى كتابه
شوفو باقى مدونتها وهى كاتبه عن السودان شئ جميل هى بس دمها خفيف وسؤالها عادى انا لو مصريه لى اقول سودانيه بس بعدين كلمه يا حلبيه غيييييييييييييييياااااااااااااااظه شديد والناس بقولها عادى


بالظبـــــــــــــــــــــــــــط دة الكنت قاصداه.... يسلم فمك ريحتيني


وختاما بطلب من الناس الشاكين في وطنيتي ديل يرجعو لأول بوستات كتبتها

كانت بعنوان

السودان (1) محبة وعشق
السودان (2) مشاركة الأحداث
السودان (3) العودة

إضافة...

دة رابط الموضوع

الحمدلله على سلامة سامي الحاج و من كانو معه

إنتو حاسيـــن بالأنا حاسة بيه؟؟؟

هل إنتو مبسوطيــــن زيي كدة؟؟؟

أنا مبسووووووووووووووووووووووووووطة

صحيت أقول لأختي تشغل المكيف عشان سخنت

لقيتا واقفة قدام التلفزيون وبتقول لي سامي الحاج جابوهو

اخدت ثانيتين عشان أستوعب

بس بجد فكوه

الحمدلله

الحمدلله

الحمدلله

((نسال الله العظيم ان يفك كل اسراء المسلمين ويعودوا الى اهلهم وذويهم عما قريب))

اللهم آميــــــــــــــــــــــــــــــــــــــــــــــــــــن

سقــــط سهواً

امبارح كان إجازة عشان التعداد
البوليس منع المواصلات من الحركة جوة المدينة... بس انا شفت كم ركشة حايمة...
ماعلينا
المهم ان البلد كانت عايشة في هدوووووء عجيب مامر علي قبل كدة...
احنا لم نمنا كان الجو حـــــــــــر والشارع زحمة وازعاج...
صحيت الساعة 7 صباحا على مكالمة مزعجة
حسيت ان في حاجة غريبة
طلعت البلكونة
الجو بارد والشارع غرقان موية كأنو بالليلة جا اعصار أو فيضان
والأغرب ان مافي ولا عربية معدية
ليـــــــــــــــــه كدة
الحصل شنو
الناس مشو وين
أوع أكون نايمة وبحلم
ولا يكون الحرب قامت واحنا نايمين والناس سافرو وسابونا

أوووه بمناسبة السفر نسيت أكلمكم

أنا وسوبرة (( أختي الصغيرة)) برانا في البيت لأن بابا وماما وسوبرمان (( أخوي الصغير)) سافرو ماليزيا إجازة
يعني عاملين Home alone

احساس عجيـــــــــــــــــــــــــــــــــــــــــــــــــــــــب

وعشان أطمنكم وما اقلقكم علينا فمعانا الغفير بيبيت في الحوش

يعني أماااااان

وبمناسبة الغفير الظريف دة اللي صحاني في مكالمة 7 صباحا حأحكي ليكم الحصل
حضرتو الساعة 11 بالليل قال اختو مسافرة بطيارة 5 صباحا وعاوز يمشي يوديها المطار
قلت ليه اوكي اتفقنا بس الصباح ما تتأخر
الساعة 2 لقيت منو مسكول
طنشت لان كنت نايمة ومامركزة
الساعة 7 لم مسكل تاني خفت وضربت ليه
خير يا ابني مالك
والله يا إيمان انا نسيت الليلة التعداد ومافي اي مواصلات
ما قدرت اودي اختي المطار ولا قادر ارجع البيت هس
ايواااااااا حسيت انو عاوز يزوغ ويقعد هناك
قلت ليه انا بجي اخدك
غسلت وشي ولبست توب امي وشبشب اسود لقيتو قدامي وطلعت (( على اساس ان ماحنزل من العربية))
وطلعت العربية من الحوش وانطلقت في رحلة اعادة الغفير

المشكلة المنطقة الوصفا لي ما بعرفها كويس
اضطريت اوقف العربية وافتش عن زول اسألو
وفعلا لقيت واحد واقف في الشارع بس للاسف طلع ما عارف الحتة
بالصدفة جا معدي واحد من النوع الفضولي حبتين
بدون ما اسألو قرب من العربية وقال لي عاوزة تمشي وين
سالتو من المنطقة وطلع بيعرفا
وصف لي
(( طلع فضولي نافع))
شكرتهم الاتنين وضغطت البنزين عشان اتحرك
بس للاسف العربية بطلت
احرااااااااااااااااج
دورتها تاني
ابت
ليــــــــــــــــــــــه ياسنفورتي
يلا اشتغلي
باسم الله
أبت برضو
محاولة تالتة ورابعة وخامسة
والعربية ولا نفس
اتلفت للراجلين الكانو واقفين
فص ملح ودااااب

ياااااااااااااااااااااااا باااااااااااااااااابااااااااااااااااااااااااا
انا خااااااايفة



اضرب لمنو
بيت عمي على مسافة نص ساعة
بيت خالي مسافة 40 دقيقة
طيب اتصل بواحد من زملائي في الجامعة
اووووووووووووه موبايلي ما معاي
ليه كدة بس
معاي موبايل امي بس
شلتو عشان رقم الغفير
طيب اخلي العربية هنا وارجع البيت
مافي مواصلات
اتخيلو عملت شنو

ضربت لسوبرة وصحيتا من النوم
طبعا اتخلعت لان مفروض اني معاها في نفس البيت
قلت ليها انا في الشارع وحصل لي كيت كيت كيت
طيب والمطلوب منها شنو؟؟؟
ماعارفة بس المهم احس ان في زول متعاطف معاي
انهينا المكالمة وخليتا مقلقة علي

الخطوة البعدها
اتصلت بزوجي
وهو برة السودان خااالص
رنيت ليه رنتين وقفلت
ورسلت ليه مسج كتبت ليه الحاصل
برضو ماعارفة استفدت شنو
يلا في زول تاني قلق علي ومابيدو حاجة يعملا

فجأة ربنا هداني افتش رقم واحد بيعرفنا ساكن قريب مننا
واتصلت بيه
كان نايم
صحيتو
قال لي بس استحم واجيكي
لولا العيب كنت قلت ليه ماتستحم
انا خاااااااااااااايفة
الشارع فااااضي
الغريبة حتى الكلاب اختفت
مابعرف كيف
المهم
الجو كان جميل طبعا نتيجة امطار الليلة السابقة
فتحت الشباك ومسكت الموبايل بقيت العب

بعد نص ساعة كدة الزول دة وصل
وفتح الكبوت بتاع العربية
اللي انا طبعا ما بفهم فيه اي حاجة

وماعرف يصلح المشكلة لان على كلامو (( البطارية فيها كربون كتير))
اتصل بميكانيكي
وحيــــــــــــــــــــــــلك لغاية ما الميكانيكي جا
طبعا نسيت اقوليكم ان الغفير اتدبر حالو وجا
الميكانيكي جا (( صنفر البطارية)) والحمدلله اشتغلت
رجعنا البيت بالسلامة
بعد ما وصلنا
جارنا داك قال يشيك لي على الموية بتاعت العربية
اول ما فتحا
حرقتو
وطلع دخااان والموية اندفع وفارت
قال لي العربية دي مسخنة شديد
شكلو مافيها زيت
شيك على الزيت

وياللإحراااااااااااج
ارتفاع الزيت في المقاس ما تامي 1 سم
قال لي العربية دي ما تشغليها مالم تكبي ليها زيت
طيب اجيبو من وين
الليلة المحلات مقفولة
خلاص بكرة
جدا
وطبعا كنا مخططين نطلع ونتفسح لان اجازة والشوارع فاضية
اتحبسنا والحمدلله
ولحد اللحظة دي انا ما عارفة امشي اجيب زيت من وين وكيف واكبو وين
وخجلانة اتصل بالراجل دة تاني

عموما قضينا اليوم محبوسين بانتظار العدادين اللي لحدي اللحظة دي ما عدونا

يعني من هس بكلمكم عدد سكان السودان لعام 2008 ناقص 6 أفراد

ماتنسو

تحديــــث:

بعد جهد وعناء جبن لي سنفورة (( الترياااق)) وشربناها منو كميات نتج عن ذلك زوال الحمى والآلام وأتبعناها ب (( شاور)) من المياه الباردة وانتعشت سنفورة ورجعت ليها (( ولينا)) الابتسامة

وعادت سنفورة تلعب مع السنافير

خطوة للأمام

صباح الخير

معليش طولت ما كتبت (( نظام البت مشهورة وعندها جمهور وبتعتذر ليه)) كنت مشغولة شوية وكمان بالي مشغول بحاجات كتيـــــــــــــــــــــــــــــــــرة ومافي زول عاوز يفكر معاي (( اخس على دي صحوبية))

يلا... ما علينا.... أصلا المثل بيقول ماحك جلدك مثل ظفرك



المهم... أنا (( كالعادة)) عندي موضوع خانقني وعاوزة أتفش... (( أنا ما عارفة لو ما المدونات دي كنت حأفضفض وين))....

الحكاية بتتلخص في سؤال بسيط

هل لازم احنا المسلمين نكون طبقتين

يا إما ملايكة أو اباليس؟؟؟

يعني الواحد فينا يا إما يكون ملتزم ومتدين لأقصى درجة ويعزل نفسو عن كل الملذات أو يكون منحط (( معليش على الكلمة بس عشان تفهموني)) وينغمس في الملذات؟؟



يعني ماممكن واحد يمشي في طريق الالتزام خطوة خطوة؟؟

ماممكن واحد يتدرج؟؟

مثال بسيط.... ليه لو واحدة اتحجبت ورقصت في عرس بيهمس ليها بعض الناس بكلام مزعج نوع (( شنو ياحجة الحجاب وين!!!)) أو (( دة نظام مولانا الذي غشانا)) أو (( الحجاب دة وهمة ولا شنو؟؟))

يعني عشان غطت شعرها وسترت جسمها يبقى التزمت مية مية؟؟؟ طيب شنو أحسن واحدة لابسة محزق وعريان وجسمها مرسوم رسم وبترقص في حفلة مختلطة وتانية لابسة حجاب ولبس محترم وبترقص برضو؟؟؟

مثال تاني واحدة بطلت تصافح (( علما بإن المصافحة أصلا حرام)) يعني ما عملت حاجة تطوعية كدة ولا سنة ولا كدة

لالا هي بس خطت خطوة لقدام

بطلت تصافح إذا لازم تتنقب؟؟؟

ولا لازم ما تتكلم مع أولاد؟؟؟

ما تسلم على ولد خالتا لو جاهم البيت (( يعني ما تقول ليه السلام عليكم))

أنا بصراحة لي حوالي سنة من بطلت المصافحة... انا ما حأقول بقيت متدينة... أنا بس بطلت حاجة بتزيد ذنوبي بدون ما أكون استمتعت بيها.... ماتستعجلو تفهموني غلط... بس الموضوع ان انا ((ما)) وصلت مرحلة من التدين إن أقدر أعمل كل حاجة صح وزي ما كلنا عارفين إن أصعب جهاد هو جهاد النفس... (( إن الواحد يقدر يسيطر على غريزتو ويبتعد عن الحرام بكل أنواعو))... أنا لسة ما بقدر أمنع نفسي عن كــــــــــــل حاجة حرام.... يعني ما قادرة ما أسمع اغاني مع ان عارفة الأغاني حرام... بس الفرق إن أنا بستمتع بالأغاني..... يعني ماقادرة أوقفا.... بس ما بستمتع بالمصافحة وبكل سهولة قفلت الباب دة وكدة اتحاشيت كم هائل من الذنوب.... خصوصا ان في ناس كانو بيزودوها وبيسلمو بالكتف.....

يلا بعد بقيت ما بصافح اتعرضت لكمية من المواقف والمضايقات كأنو ارتكبت جريمة....

والله لدرجة مرات كنت برجع من الجامعة وبركن عربيتي على جنب الشارع أبكي شوية وأمسح دموعي قبل أوصل البيت...

يعني مثلا

واحد زميلي قال لي عاوزك في موضوع بعدين...

قلت ليه خير....

قال لي سمعت إشاعات كدة ما عجبتني (( اتخيلو إنها اشاعات وكمان ما عجبتو))

قلت ليه شنو؟؟...

سمعت انك بطلتي مصافحة....

قلت ليه صح....

ليه ياترى؟؟؟

والله قناعة وراحة نفسية

بس؟؟؟؟

أيوة بس

يعني باقي الإشاعة ما صح؟؟؟

ياترى شنو باقي الاشاعة

قالو انك اتشوكشتي.... وحبيبك باعك وجاتك حالة نفسية.... وبما ان الاولاد لم تجيهم حالة نفسية بيبطلو يحلقو لحيتهم وكدة بيبدو انهم اتدينو (( يعني سبحان الله الواحد مادام التزم شوية يبقى مريض نفسي)) فالحصل ان سمعت انك اتشوكشتي وعدم المصافحة دة بداية الأعراض النفسية التدينية

قلت ليه أبدا ماكدة... هي بس قناعة.... حاولت اطبقا وعمري 14 سنة بس الناس ما رحمتني

وكنت صغيرة على ان اقاوم الضغط دة... بس المرة دي ان شاء الله حستمر...

ودي كانت آخر مرة اتكلم معاي...



و واحد تاني مالاقيتو من فترة.... يوم قاعدة مع صاحبتي جا سلم عليها... وعاين لي قال لي والله يا إيمان خايف أقوليكي مشتاقين تقولي لي استغفر الله.....

وواحد قال لي دي شنو (( العوارة)) دي...

و واحد سماها (( حركات )) بتاخد يومين وتنسيها...

وناس قالو لفت انتباه....

وبت حاولت تتظارف مع ولد وتحرجني قدامو بحركات بايخة كدة....

طبعا دة كلو من الناس المتحررين.... بس ردة فعل الناس الكويسين برضو غريبة نوعا ما

يعني أول ما اقول للواحد ((عفوا ما بصافح)).... يقول لي كوزة ولا أنصار سنة؟؟؟؟

هو أنا لازم أتحزب؟؟؟

أنا ما تابعة لأي حزب...

أنا مؤمنة بالله وملائكته وكتبه ورسله وباليوم الآخر وبالقدر خيره وشره....

مصدقة للرسالة المحمدية وعارفة ان الصلوات المفروضة خمسة وان في سنة وتطوع... وان صيام رمضان فرض والحجاب فرض و...الخ...

يعني ماممكن أكون مسلمة عادية؟؟؟؟

مش في دينا الحلال بين والحرام بين وما بينهما شبهات فاجتنبوها؟؟؟

ماممكن الواحد يمشي لقدام بدون ما يضايقوه؟؟!!

بدون ما يجوه ناس ياخدوه على انفراد ويحاولو يعرفو (( المصيبة)) الخلتو يعمل كدة شنو؟؟؟

والله ناس من أقرب الاقربين لي طعنوني بالكلام.... نوع (( بكرة تقولي عاوزة تتنقبي كمان))

طيب مالو لو اتنقبت؟؟

هو انا لو التزمت الحولي بيفخرو بي ولا يستعرو مني؟؟!!!

يعني لو واحد قريبتو ماشة بجينز واستريتش بيفخر بيها أكتر من واحد قريبتو متنقبة؟؟!!
أنا ما ممكن أقول لواحدة اتنقبت دة شنو العملة المهببة دي!!! بالعكس ببارك ليها وأقوليها ياريت عندي زي عزيمتك... لأن هي في اللحظة ديك أحسن مني...

الغريبة كمان في ناس بتناقش معاي الموضوع كأنو أنا اتخذت قرار خاااااااااطيء وهم عليهم يعيدوني للصواب

ياخي انتو خسرانين شنو

انا ماعاوزة اصافح وأنا حرة....

كفاية تكونو غلط مافي داعي تاخدو ذنبي... يعني كفاية ذنوبكم

أيوة أبعدو عني.... ولو ما بتفخرو بي وبتعتبرو عدم مصافحتي احراج ليكم قدام الناس فأنا كمان ما بفخر بيكم وبعفيكم من (( المعاناة الممكن تلحقكم بسببي))

وربنا يهدينا جميعا

bride with the sky

آلام عند حني الظهر كالركوع والقيام من الركوع
آلام عند تغيير الوضع

(( الجلوس أو الاستلقاء))

آلام غريبة نوعا ما بالأفخاذ

طوااااااااااالي جري على قوقل

(( صديقي الوفي))

نتيجة البحث

درجة خفيفة من الانزلاق الغضروفي

لالالالا ما جادي

عيد البحث

اعراض انزلاق الغضروف

ياها زاتا الاعراض

نرجع ورا شوية

القصة بدت شهر 10 مع عملية الوالدة

كانت بتخاف شديد على جرح العملية وعندها هاجس ان الجرح ممكن يفتح

عشان كدة ما بتقوم من الرقاد لو ما سندتها

شوية شوية بقى يجيني الم في ضهري بس بتناساه

رجعنا السودان الحمدلله ودخل علينا عيد الفطر

خدمة الوالدة وضيوف الوالدة وضيوف العيد

الحمدلله بس

عدى عيد الفطر على خير وارتحنا شوية ونسيت موضوع الضهر

كنا الفترة ديك ناويين نعمل صيانة كاملة للبيت

لان كان في مشكلة تسريب في ماسورة داخلية وشوهت منظر الحيطان

دة غير ان اهلي -قبل ما يتقرر لامي العملية- قررو يغيرو العفش القديم وفعلا

اشترو العفش الجديد وملحقاتو

يعني في برنامج صيانة لاااازم يتم

بس بصراحة كنت بقنعم يأجلو الموضوع

لان احنا بتين بس وتعبانين مع بيت طول في عرض ومافيه خدام

وضيوف الوالدة

ماشاء الله معارفا ومحبينا كتار

اقنعنا الوالد ان الصيانة لااااازم تتأجل

واتفقنا

وإتأجلت فعلا

ومر كم يوم كدة

وإذا باتصال دولي على جوال الوالد

يعلن بعدو

إن في عريس متقدم لإيمان

وتمت الموافقة

على أساس

أوريهم إجازتي حتكون متين

عشان يطلبو إجازاتم ويحجزو لاتمام الخطوبة

جميل

اتفقنا على كدة

بعد كم يوم

اتصال تاني

عاوزين الخطوبة تبقى عقد

ليـــــــــــــه يا بابا؟؟؟؟

عشان مكالمات بالليل دي تبقى في اطار شرعي

بس يابابا.... بس شنو؟؟

انتي مقتنعة بيه ولا ما مقتنعة

استخير

استخرنا

خلاص موافقة

تم الاتفاق

بعد كم يوم

اتصال دولي

يا أبو أيمن خير البر عاجله

وإجازة عيد الاضحى قريبة

وأخوان العريس حيكونو مأجزين برضو

لو ما عندكم مانع نتم العقد في عيد الاضحى

وبابا قال موافق

(( شكلو ما صدق يخلص مني))

بس وييييين انا قاعدة معاك لحدي ما اتخرج

هههه

المهم

بابا نسى حتة مهمة

الصيـــــــــــــــــانة

العيد قرب

واحنا اصلا حنصين البيت

ماممكن نستقبل المناسبة دي بالمنظر دة ونصين بعداك

واكتشفنا اننا لاازم نبدأ في التو واللحظة

شفتو الحكم لم يصفر اللاعبين بيجرو كيف

دة الحصل

أنا وأخواني

وأبوي

وحتى أمي بجرح العملية الما تم شهر

والغفير

بقينا في حالة استنفااار قصوى

نلملم العفش

والكرووور

ونفضي دواليب العدة

حالة صعبة

وفي نفس الوقت مفروض نجهز للعقد

الهدوم

الخبيز

العشاء

الخ

حالة ما يعلم بيها الا ربنا

مرات كنا انا وامي نحضن بعض

ونفتحو بيت بكا

احساس بالعجز

(( مع ان الموضوع عدى على خير وبحكي ليكم من باب الدعابة بس... الا ان العبرة خنقتني بجد ))

البيحرق الدم اكتر العمال السودانيين

مافي مواعيد

مافي التزام

الصباغ مستني الكهربجي يخلص والكهربجي عاوز بتاع الجبس يفتح ليه الفتحات وبتاع الجبس عندو بكا

وجا من البكا بعد اسبوعين ما شايل عدتو

قال العدة مستلفة واحد ومارجعا

جاي ليه حضرتك طيب!!! عايز قروش

المهم الوقت ضايق شديد

في خلال أسبوع لازم تكون الصيانة خلصت والعفش اتركب والبيت اتنضف عشان التعارف

في الأسبوع دة كنا كلنا صنايعية

بابا يركب الشبابيك لان بتاع النملية فكاهم ونسى يركبم

واخوي الصغير يعتل الكراسي مع اختي الصغيرة

وأمي مشرف عام

والفقيرة إلى الله عتال

وشيالة تقيلة كمان

(( القال العروسة بترتاح وبيتعبو عشانا منو؟؟))

آخر حاجة عملتها

وياريتني ما عملتها

كان في طربيزة سفرة كبيرة

مقاس 12 كرسي

نوع ياجبل ما يهزك ريح

ومفروض تطلع من البيت

النجار شال من جهة

وعاوز مساعدة

ناس البوهية عملو رايحين

والغفير قال ماشي ياكل

وماعارفة الباقيين وين

المهم شالتني الهاشمية

اتشمرت وشلتها معاه

وصلناها باب المدخل بطلوع الروووح

مرة شيل ومرة لز

واتنفست الصعداء

وكان لازمني كباية موية لأن حلقي أصابو الجفاف

دنقرت للحفاظة أكب الموية

و

و

و

كهـــــــــــــــــــــربا

أطلقت صرخة خليت كل الفي البيت يلحقوني

جات أمي صرخت معاي

بقت مافاهمة الحاصل شنو

أنا مدنقرة وماقادرة اتحرك وببكي

ومع شوية دلك ومساج استعدلت

بس الألم بقى مصاحبني

قضيت الكم يوم الباقية على السرير

ما بدنقر الا للضرورة

بصلي جالسة

وما ساعدت في أي حاجة تانية

والنكتة إن

جا العريس بعد كم يوم

البيت مرتب وجميل وكل حاجة تمام

بس

العروسة معسمة

do people like you??

People Definitely Like You

You are very well liked, and many people admire you. You are friendly, well mannered, and fun to be around. Of course, you're not perfect... but that's okay. Your friends are usually willing to accept you for who you are! What People Don't Like About You: People don't like that you forget them easily. No one wants to be friends with someone who doesn't remember their name! People don't like that you are judgmental and overly opinionated. Even if you are always right, they don't like to be reminded of it! People don't like that you put others down and like to gossip. They are worried that you also gossip about them! What People Like About You: People like that you give them complements. You make people feel good about themselves! People like that you are genuine and real. They can count on you to be yourself. People like that you're interesting and intriguing. You always have something interesting to say.

Do People Like You?

محاولة شعرية أخرى عسى أن تنال إعجابكم

حبيبي انت تملكه.... ما ب أيسر الصدر ِ
فؤادٌ هام بك عشقا... آآآه أنت لو تدري
رُميتَ بأسهمي حبا... وما أدراك ما وتري
هواك القوس يارجلا... جهرت بنورك البدر ِ
جمال في محياك... يكفي باقي البشر ِ
وجه فاق اوصافي... جميل يسحر السحر ِ
كأن الثغر من لؤلؤ... وخد يبدو كالزهر ِ
كحيل العين احورها.... بصير نافذ البصر ِ
حكيم العقل والفكر... تصد الشر بالخير ِ
قد لا تنصفك كلماتي... ولا اوفيك بالصور ِ
تبارك خالق الاكوان فــ .. ــقد سواك من درر ِ

العنصرية

صباح الخير

طبعا أنا لسة باقي لي إمتحان أخير بكرة إن شاء الله.... بس الموضوع دة غلبني وما قدرت أصبر لي بكرة
فقررت أكتبو هس يمكن شوية أرتاح وأركز في قرايتي

الحكاية ومافيها إن أقرب صاحبة لي في الجامعة لم تحب تخفف دمها وتتظارف بتقول لي ياحلبية يامقطعة أو عاينو الحلبية المعفنة دي ... المهم لازم تدخل كلمة حلبية مع شتيمة وتضحك بعداك وكلمة حلبية للما بعرفا بتطلق على السودانيين اللونم أبيض عشان في جماعة لونم أبيض أصلهم من مدينة حلب السورية استوطنو السودان من فترة فبالتالي بقى أي أبيض من أي قبيلة حلبي.... أنا قصة حلبية دي ماعندي معاها مشكلة شديد وبالذات ان بيني وبين صاحبتي مافي زعل ولا حساسية....بس بيغيظني الكلمة البعدها... يعني وكأنو أي أبيض معفن أو أي أبيض مقطع (( بخيل))

كنت ساكتة على الموضوع دة لحدي ما كنا في الجامعة من فترة بنتناقش في موضوع القبائل.... صاحبتي محسية ومعانا ولد جعلي وولد شايقي من دفعتنا..... كنا بنتونس وكل زول بيكاوي التاني بعيوب قبيلتو.... وفجأة سألوني من قبيلتي.... وريتم قبيلة الوالد وقبيلة الوالدة.... وبما إننا من ما جعليين ولا شوايقة ولا رباطاب ولا محس فما كان من الجماعة الا انهم اتفقو على اني ما سودانية.... اتهموني بأني مصرية ومتسلبطة في السودانيين ساي المصيبة إن اتسلبط فيهم على شنو؟؟؟؟؟؟!!!!!!!!! هو من حلاتو السودان دة ولا من الكرم البنلقاه في المطارات لم يشوفو الباسبورت السوداني... ولا من حسن سمعتنا بين الدول التانية.... يعني أنا لو كنت مصرية هل كنت حأفكر أبقى سودانية؟؟؟؟

الخلاني أكتب الموضوع دة إني مغيوووووووووظة.... يعني المجتمع الدولي محتار هل السودان فيه عنصرية ولا لا......... انا بقوليهم فيـــــــــــــــــــــــــــــــــــــه... مش عنصرية في تقسيم السلطة والثروة.... الكلام دة كبير علي وما بفهمو بصراحة....ولا بحب أتكلم فيه.... بس انا بشوف العنصرية اجتماعية..... ومرضية...... يعني مافي سوداني مرتاح.... الغرباوي أو الجنوبي بيعتبروه عبد.... لا وكمان من يومين سمعت لفظ جديد (( فرخ أو فريخ للتدليل يعني)).... مهما كان مركزو ومهما كانت ثقافتو ووظيفتو لم يتكلمو الباقيين عنو بيقولو فلان داك (( العبد))

وبيستحضرني موقف حصل لي في الجامعة... بيدرسنا دكتور غرباوي (( من غرب السودان)) ويوم نازلة من القاعة لقيت مجموعة من زملائي متلمين في اجتماع سري حوالي 10 أشخاص كدة... كان واضح ان في شماااار حاصل.... وأنا طبعا لا أقاوم الشمارات غريزة نسائية مشيت ليهم وقفت معاهم وسألتهم في شنو.... ردو علي إن الدكتور الفلاني هو الحيخت لينا الإمتحان.... قلت ليهم ياتو؟؟؟ قعدو يوصفوه وانا مابعرف اسمو... فجأة قلت ليهم الغرباوي؟؟؟؟ واذا بالجوطة الكانت حاصلة والاصوات الكانت بتلعلع كلو اختفى كأن وقعت عليهم صاعقة.... وبدو يلكزوني ويغمزو لي... أتاري معاهم في المجموعة ولد غرباوي.... واعتذرو ليه بالنيابة عني... وأخدوني على جنبة وقالو لي دة شنو الهببتيه دة.... أنا ماعارفة انا هببت شنو!!!! يعني هو فعلا غرباوي... وغرباوي هنا دي جنسو مش شتيمة.... ليه هم ارتبطت ليهم الكلمة دي بالشتيمة والإساءة.... الله المستعان

نرجع لموضوعنا... قلنا لو إنت غرباوي أو جنوبي فبالنسبة للناس انت عبد.... والعبيد مهما حصل ومهما اترقو ماليهم أمان.... وماعندهم ذمة ولاضمير.... الخ

لو إنت شايقي معناها إنت بخيل وراجل (خايب) معليش في الكلمة دي.... لأنو بيقولو المرأة الشايقية (( جريئة وعينها قوية)) وبالتالي شخصية الرجل الشايقي ضعيفة قدام مرتو...

طيب لو إنت جعلي إذا إنت أحمق وعقلك صغير.... والمرأة الجعلية مغروووووورة وفاكاها في روحا

رباطابي معناها مسيخ ولسانك زي السم

حتى لو قلت نكتة برضو انت مسيخ

طيب أهل العوض مع أهل الشرق بصفة عامة... ناس متخلفين ماعندهم برستيج بتعريفة... استغلاليين ودمهم تقيل

وهكذا دوااااليك

بجد حاجة تغييظ.... الشي المعروف ان طباع الواحد مرتبطة بشخصيتو هو... وبالتربية اللي اتربى عليها.... وممكن يكتسبا من المجتمع العاش فيه.... يعني اسم قبيلتك بعيد كل البعد عن شخصيتك... يعني لو أصلك من الغرب (( حتى لو عمرك ما مشيتو)) ما معناها ان ماعندك ذمة وماليك أمان.... يعني هو مافي غرباوي ملتزم وبيعرف ربنا؟؟؟؟!!!!!

ولا مافي شايقي شخصيتو قوية؟؟؟؟

بعدين سؤال محيرني.... لوالجنوبي والشمالي وأهل الشرق والغرب بيعانو من العنصرية والسب والشتم.... منو العنصري في الموضوع بالظبط؟؟؟!!! منو هو السوداني ال100% مافيه عيوب وقاعد يعيب في الباقيين؟؟!!!!

حاجة تاني مرتبطة بالموضوع دة...

شرايط النكت... ناس محمد موسى وفرقة تيراب والجماعة الطيبين... أيوة هم ظريفين وبيسلو الواحد بس ممكن يكونو ظريفين بدون تجريح وإساءة.... يعني بدل ما يقولو رباطابي عمل ممكن يقولو واحد مسيخ عمل وبكدة ينسد باب من ابواب العنصرية....

وكدة لم نكون بنسمع نكتة ما يكون واحد من الموجودين عاوز يبكي من الزعل او يطق فيه عرق.... يعني والله الدنيا اتغيرت والناس طلعت من قوقعة الحلة والقرية وثقافتا اتوسعت.... فما صح البنعمل فيه دة...... ماصح نعمم..... لأن اللون ما بعيب زول والاسم ما بعيب زول.... البعيب الانسان جهلو وسوء خلقو..... وأنا بعتبر أي واحد (( بيهبل)) و (( بيسيء)) بانسان تاني هو في شخصو انسان ضعيف وبيغطي عيب فيه....

وبعدين ليه أي واحد لونو أبيض حلبي مقطع وأي واحد لونو أسمر عبد.... طيب هو الناس ممكن تكون شنو غير اللونين ديل؟؟!!

اتذكرت مثال للحاجة دي هس.... موقف تاني حصل لي في الجامعة...

في طالب عزيز علي جدا في الدفعة.... طيب ومتواضع وقلبو أبيض زميلي دة لونو أسمر غامق شويتين... بس بأمانة أنا ما بعرف هو جنسو شنو.... ولا فارق معاي يعني... لأن رأيي فيه اتكون نتيجة تعاملو الراقي وماليه أي علاقة بالأصل.... عموما تصادف إن بيحب الانترنت ومدمن زي حالاتي كدة.... فقررنا إننا نعمل موقع غير رسمي لجامعتنا... يكون زي ملتقى للطلبة ومنتدى وصفحة أدبية والخ.... وأخدنا يومين كدة طالعين نازلين مع بعض نصور المكتبة والمباني والدكاترة والمدخل والخ.... عشان التصميم بتاع الموقع... واحنا نازلين من الادارة لاقانا واحد تاني من زملائنا.... من شافنا ماشين سوا جا علينا وهو فطساااااااااان ضحك.... وفي نص ساحة الجامعة قال لينا (( شنو اللم الشمال مع الجنوب)) وفطس على نفسو ضحك..... طبعا زميلي اتحرج من الموقف وانا اتحرجت من احراج زميلي... ماعلقنا للولد وطنشناه ومشينا...

تاني يوم لقانا ماشين مع بعض تاني جرى علينا وقال بصوت عالي مسموع... أنا نفسي أفهم إنتي شنو العاجبك في العبد دة؟؟؟!!!!

اتخيلو الاحراج

تاني يوم ناديتو على جنب وقلت ليه ان الحركة اللي عملا امبارح كانت بااايخة وعنصرية ومحرجة والخ.... وبأمانة كنت معصبة عليه.... ويمكن دي غلطتي

عمل شنو حضرتو؟؟!!! طلع من القاعة... نادى زميلي دخلو القاعة.... خت يدو على كتفو... وقال لي:

انتي زعلانة عشان قلت عليه عبد؟؟؟؟ طبعا سكت ومارديت... اتوقعتو يعتذر...

واصل كلامو وقال شنو؟؟؟ قال ماهو فعلا عبد..... وانا تاني بسألك انتي شنو العاجبك في العبد دة؟؟؟!!!... وطبعا كان أسوأ لحظة مرت علي..... شلت شنطتي وطلعت من القاعة... لأن خفت لو قعدت ثانية تاني زميلي ينفعل ويضرب الولد وطبعا دي فيها رفد من الجامعة....

طبعا احنا المواقف دي بتمر علينا يوميا وأكيد في زول بيتألم فيها... يعني لو واحد جعلي حكى لشلة من اصحابو نكتة عن الشوايقة وتصادف ان بينهم واحد شايقي.... حيضحك عشان ما يقولو عقلو صغير... بس لابد انو من قلبي بيتضايق.... لان بحس انو هو المقصود

وقيسو على كدة كتير

أأه أنا كدة شوية ارتحت وقلت اللي جواي

الحمدلله